ہندوستان کی فیشن انڈسٹری میں گزشتہ چند برسوں کے دوران کئی نئےبرانڈز نے اپنی شناخت قائم کی ہے، لیکن چند ہی ایسے ہیں جو مختصر مدت میں نوجوان نسل کی توجہ حاصل کرنے میں کامیاب ہوئے۔ کوراسٹوری انہی برانڈزمیں سے ایک ہے، جس نے مغربی طرزِ لباس، جدید فیشن رجحانات اور نسبتاً مناسب قیمتوں کے امتزاج سے ہندوستانی خواتین کے درمیان اپنی ایک الگ پہچان بنائی ہے۔

ہندوستانی مارکیٹ میں طویل عرصے تک زارا اور ایچ اینڈ ایم جیسے بین الاقوامی برانڈز کافیشن کی دنیا پر غلبہ رہا ہے۔ تاہم، ان برانڈز کےکپڑے اکثر ہندوستانی خواتین کی اوسط لمبائی، جسمانی ساخت اور موسم کے لحاظ سے موزوں نہیں ہوتےتھے۔ اس خلا کو پُر کرنےکیلئے منجولا تیواری نے فیوچر گروپ کے زیرِ سایہ ’فیوچر اسٹائل لیب‘کےبینرتلے ۲۰۱۶ءمیں کور اسٹوری کی بنیاد رکھی۔ برانڈ کا بنیادی مقصد ہندوستانی خواتین کو سستی قیمتوں پر بین الاقوامی معیار اور جدید ترین مغربی ملبوسات فراہم کرنا تھا۔ بعد ازاں، ریلائنس ریٹیل نے اس برانڈ کو حاصل کر لیا۔

کور اسٹوری نام دراصل فیشن میگزینوں کی دنیا سے ماخوذ ہے۔ کسی بھی میگزین کی کور اسٹوری اس کا سب سے نمایاں اور اہم موضوع سمجھاجاتاہے۔برانڈ نے اسی خیال کو اپناتے ہوئے یہ پیغام دیا کہ ہر خاتون اپنی زندگی کی ’کور اسٹوری‘خود بن سکتی ہے اور اس کا لباس اس کی شخصیت کا اظہار ہے۔

کور اسٹوری بنیادی طور پر خواتین کے ملبوسات کا برانڈ ہے۔ اس کی مصنوعات میں مغربی طرز کے ٹاپس،شرٹس اور بلاؤز،ڈریسز، اسکرٹس، ٹراؤزرز،جیکٹس، جمپ سوٹس، ڈینم کلیکشن، پارٹی ویئر اور آرام دہ روزمرہ ملبوسات شامل ہیں۔برانڈ کی خاصیت یہ ہے کہ اس کے ڈیزائن اکثر یورپی اور امریکی فیشن رجحانات سے متاثرہوتے ہیں، لیکن انہیں ہندوستانی مارکیٹ کے مطابق ڈھالا جاتا ہے۔

کور اسٹوری نےخاص طور پر ۱۸؍سے ۳۵؍سال کی عمر کی خواتین کو اپنا ہدف بنایا۔ کالج کی طالبات، نوکری پیشہ خواتین اور شہری علاقوں میں رہنے والی نوجوان خواتین اس برانڈ کی بنیادی صارفین ہیں۔اس کی مقبولیت کی ایک بڑی وجہ یہ ہے کہ برانڈ مسلسل بدلتے ہوئےفیشن رجحانات کے مطابق نئےکلیکشن پیش کرتا رہتا ہے۔ جو ڈیزائن لندن، پیرس یا میلان کے فیشن رجحانات میں دکھائی دیتے ہیں، ان سے متاثر ملبوسات نسبتاً کم وقت میں کور اسٹوری کے کلیکشن کا حصہ بن جاتے ہیں۔

 

 

کور اسٹوری کی سب سے منفرد بات یہ ہے کہ اس کا اپنا ڈیزائن اسٹوڈیو لندن، برطانیہ میں واقع ہے۔لندن میں موجود ڈیزائنرز کی ٹیم پیرس، میلان اور نیویارک کے رن وے فیشن اور اسٹریٹ اسٹائل پر گہری نظر رکھتی ہے۔ رن وے کے ان ڈیزائنز کو محض کاپی کرنے کے بجائے، انہیں ہندوستانی خواتین کی پسند، کپڑے کی نوعیت اور موسم کے لحاظ سے تبدیل کیا جاتا ہے۔ مثال کے طور پر، ملبوسات کی فٹنگ اور لمبائی کو ہندوستانی جسمانی ساخت کے مطابق تیار کیا جاتا ہے تاکہ وہ آرام دہ اور پروقار نظر آئیں۔

 

 

ریلائنس ریٹیل میں آنے کے بعد کور اسٹوری نے ملک گیر سطح پر تیزی سےاپنے نیٹ ورک کو بڑھایا ہے۔ملک کے تمام بڑے شہروں (جیسے ممبئی، دہلی، بنگلور، پونے، اور کولکتہ) کے مشہور مالز اور ہائی اسٹریٹس پر اس کے اپنے اسٹورز موجود ہیں۔ ممبئی میں اس کے اسٹورفنکس مارکیٹ سٹی کرلا اور نوی ممبئی،آر سٹی گھاٹکوپر،اِن آربٹ ملاڈ اور نیکسس سی ووڈ مال میں موجود ہیں۔اس کی ویب سائٹ اور معروف ای کامرس پلیٹ فارمز جیسے مائی اینٹرا (Myntra) اور اجیو (AJIO) پر بھی اس کی مصنوعات دستیاب ہیں۔