قازقستان کے دارالحکومت نورسلطان کی زیرنظر مسجد کا نام بھی نورسلطان جامع مسجد ہے۔

قازقستان کے دارالحکومت نورسلطان کی زیرنظر مسجد کا نام بھی نورسلطان جامع مسجد ہے۔ اس کا تعمیراتی کام ۲۰۱۹ء میں شروع ہوکر ۲۰۲۲ء میں پایۂ تکمیل کو پہنچا اور اِسی سال اگست میں   تین دہائیوں تک قازقستان کے صدر رہ چکے نظربائیف کے  ہاتھوں اس کا باقاعدہ افتتاح عمل میں آیا۔ اس مسجد کا شمار دنیا کی ۱۰؍بڑی مساجد میں ہوتا ہے ۔ مسجد کے گنبد کی اونچائی تقریباً  ۸۳؍ میٹر ہے   اور اس کے اطراف میں چار مینار ہیں  جو گویا ایمان کے  بعد اسلام کے چار ارکان نماز، روزہ، حج اور زکوٰۃ کو پیش کرتے ہیں۔مسجد کا داخلی دروازہ لکڑی کا بنا ہوا ہے، جس کے بارے میں کہا جاتا ہے کہ یہ  دنیا کا سب سے اونچا  دروازہ ہے ۔ مسجد کے اندرونی دروازے اور دیواروں پر قرآن کریم کی آیات کی خوبصورت خطاطی کی گئی ہے ۔ قبلہ کی جانب والی دیوار پر  رب العالمین کے ۹۹؍اسمائے حسنیٰ  دیکھے جاسکتے  ہیں جنہںی اُبھارنے کیلئے تقریباً ۲۵؍ملین مختلف رنگوں کے شیشے کا استعمال ہوا ہے۔ مسجد کے اندرونی حصے میں قازقستان میں ہاتھوں کے ذریعے تیار کئے گئے قالین بچھائے  گئے ہیں۔