یہ کورس ایم بی بی ایس اور ایم بی بی ایس کی مساوی ڈگری کے بعد کئے جائیں گے۔ مرکزی وزارت صحت و خاندانی بہبود نے نوٹیفکیشن جاری کیا ہے

  کورونا وائرس (کووڈ۱۹) کے بحران کے دور میں ملک کے دور دراز اور دیہی علاقوں میں طبی ماہرین کی شدید قلت کے پیش نظر مرکزی حکومت نے میڈیکل کے مختلف شعبوں میں ۸؍ نئے ڈپلوما کورسیز کی شروعات کو منظوری دی ہے۔مرکزی وزیر صحت و خاندانی بہبود نے اتوار کے روز بتایا کہ اس سلسلے میں چند روز پہلے ہی ایک نوٹیفکیشن جاری کیا جاچکاہے۔ یہ کورس ایم بی بی ایس اور ایم بی بی ایس کی مساوی ڈگری کے بعد کئے جائیں گے اور ان کورسیز کا  دورانیہ دو سال کا ہوگا۔ جن نئے کورسوں کو متعارف کرایا گیا ہے ان میں اینستھیسیالوجی، اوبسٹریٹکس اینڈ گائناکالوجی، پیڈیاٹریکس، فیملی میڈیسن، اوفتھلمالوجی، ای این ٹی، ریڈیو ڈائگنوسیس اور ٹی بی اور سینے کی بیماری کے شعبے شامل ہیں۔ یہ ۸؍نئے ڈپلوما کورسیز نیشنل بورڈ آف ایگزامنیشن کے ماتحت منعقد کئے جائیں گے۔  اس نوٹیفکیشن میں کہا گیا ہے کہ انڈین میڈیکل کونسل ایکٹ۱۹۵۶ء کے سیکشن۱۱ (سب سیکشن۲) کے تحت حاصل اختیارات کا استعمال کرتے ہوئے مرکزی حکومت نے میڈیکل کونسل آف انڈیا کے بعد تشکیل دیئے گئے گورننگ بورڈ سے مشاورت کرکے ایکٹ کے پہلے سیکشن میں ترمیم کے ذریعہ نئے کورسوں کو منظوری دی ہے۔قومی امتحانات بورڈ کی طرف سے نئے کورسوں کو منظوری دے دی ہے۔