متعدد کمپنیوں نےگزشتہ چند برسوں میں اپنے نئے اسمارٹ فونز کے ساتھ ایئرفون یا ہیڈفون ڈونگل دینے بند کردیئے تھے، مگر اب سننے میں آرہا ہے کہ موبائل کے بکسے سے فون چارجر بھی غائب کردیا جائے گا

متعدد کمپنیوں نےگزشتہ چند برسوں میں اپنے نئے اسمارٹ فونز کے ساتھ  ایئرفون یا ہیڈفون ڈونگل دینے بند کردیئے تھے، مگر اب سننے میں آرہا ہے کہ موبائل کے بکسے سے فون چارجر بھی غائب کردیا جائے گا۔ اس سلسلے میں گزشتہ دنوں یہ رپورٹ آئی تھی کہ  ایپل کی جانب سے آئی فون۱۲؍ میں مفت چارجر نہ دینے پر غور کیا جارہا ہے۔  یعنی اب  صارفین کواسے علاحدہ سے خریدنا پڑے گا۔ اطلاعات ہیں کہ سیمسنگ بھی اسی سمت قدم بڑھارہی ہے، کوریائی ویب سائٹ ’ای ٹی نیوز‘ کے مطابق سیمسنگ بھی اگلے سے سال کچھ ایسا ہی کرنے کی منصوبہ بندی کررہی ہے۔رپورٹ کے مطابق فون کے ڈبے سے چارجر کو نکالنے سے کمپنی کوفائیو جی ٹیکنالوجی کے بڑھتے اخراجات میں کچھ کمی لانے میں مدد مل سکے گی۔ کمپنیوں کے خیال میں لوگوں کے پاس پہلے ہی گھروں میں متعدد فعال چارجرز موجود ہوتے ہیں خصوصاً یو ایس بی سی اور لائٹننگ کیبلز بہت زیادہ عام ہیں۔ماہرین کے خیال میں اس طرح ماحولیاتی آلودگی کو بھی کسی حد تک کیا جاسکے گا کیونکہ ایسے چارجرز کی تعداد میں کمی آئے گی جن کو لوگ گھروں میں پھینک دیتے ہیں۔ مگر یہ اقدام بیشتر صارفین کو پسند نہیں آئے گا کیونکہ کمپنیاں ان سے چارجر کے الگ پیسے لیں گی۔ کمپنیوں کے اپنے چارجر کافی مہنگے ہوتے ہیں اور صارفین اس کے نتیجے میں اکثر کم قیمت متبادل کو ترجیح دیتے ہیں۔ مگر ان کا معیار ناقص ہونے سے فون کی چارجنگ متاثر ہوتی ہے جبکہ فون کو نقصان پہنچنے کا خدشہ بھی ہوتا ہے۔