متعلقہ بوتھ پر دوبارہ پولنگ ہوگی، کمیشن کی کار خراب ہونے پر بی جےپی لیڈر کی گاڑی میں لفٹ لینے کا عذر پیش کیاگیا
EPAPER
Updated: April 03, 2021, 11:36 AM IST | Agency | Karimganj
متعلقہ بوتھ پر دوبارہ پولنگ ہوگی، کمیشن کی کار خراب ہونے پر بی جےپی لیڈر کی گاڑی میں لفٹ لینے کا عذر پیش کیاگیا
آسام میں دوسرے مرحلے کی پولنگ کے بعد کریم گنج میں جمعرات کو بیدار شہریوں اور پارٹی کارکنوں کے ذریعہ بی جے پی امیدوار کی ایک کار پکڑنے اوراس میں سے ای وی ایم مشین برآمد کرنے کے معاملے میں رسوائی کے بعد الیکشن کمیشن نے ۴؍ افسران کو معطل کردیاہے۔ ساتھ ہی جس بوتھ کی ای وی ایم بی جےپی کے امیدوار کی کار میں برآمد ہوئی ہے وہاں دوبارہ پولنگ کرانے کافیصلہ کیا گیا ہے۔ اس واقعہ کے بعد الیکشن کمیشن کی غیر جانبداری پر بھی سوال اٹھنے لگے ہیں۔ یو ڈی ایف اور کانگریس نے اسے ای وی ایم کو ’’چوری ‘‘ کرکے اس میں چھیڑ چھاڑ کرنے کی کوشش قرار دیاہے۔د وسری جانب کمیشن کا کہنا ہے کہ جو ای وی ایم مشین ملی ہے اس کے ساتھ چھیڑ چھاڑ نہیں ہوئی۔کمیشن نے حالانکہ اس معاملے پر سرکاری طور پر کوئی صفائی پیش نہیں کی ہے مگر کمیشن کے اہلکاروں نے یہ عذر پیش کیا ہے کہ رتابیری اسمبلی حلقے میں واقع ۱۴۹؍ اندرا ایم وی اسکول کے بوتھ کی پولنگ پارٹی جب ای وی ایم لے کر کریم گنج قصبہ جارہی تھی توراستے میں اس کی گاڑی خراب ہوگئی تھی۔