گزشتہ روز ۲؍ پولیس اہلکار سمیت ۹؍ افراد ڈسچارج کئے گئے۔ مشتبہ مریضوں کی مفت جانچ کیلئے علاحدہ سینٹر بھی جاری

یہاں مولانا  ابو الکلام آزاد اسٹیڈیم میں قائم کئے گئے کووڈ سینٹر سے بدھ کو ۹۲؍ سالہ خاتون کو صحتیاب ہونے کے بعد تالیاں بجاکرگھر رخصت کیا گیا۔ کلوا میں رہنے والے مذکورہ خاتون کو ۲۴؍دنوں بعد ڈسچارج کیا گیا۔ ان کے ساتھ دیگر ۸؍ اس طرح کل ۹؍ مریضوں کو منگل کی شب ڈسچارج کیا گیا  ہےجن میں ممبرا کے علاوہ  تھانے ، کلیان ، اندھیری اور دیگر علاقوں کے مریض بھی شامل تھے۔ 
 اس سلسلے میں کووڈ سینٹر کے کو آرڈینیٹر ممتاز شاہ نے بتایاکہ ’’۱۷؍ نومبر کو کووڈ سینٹر سے ۹؍  مریضوں کو صحتیاب ہونے کے بعد رخصت کیا گیا ہے،  ان میں کلوا میں رہنےوالی ۹۲؍ سالہ خاتون اور ممبرا  پولیس اسٹیشن  کے ۲؍  اہلکار بھی شامل ہیں۔ ‘‘انہوں نے یہ بھی بتایا کہ ’’معمر خاتو ن کو نازک حالت میں ۲۵؍ اکتوبر کو داخل کیاگیاتھا۔آئی سی یو میں ان کا  علاج کیا گیا اور کورونا سے صحتیاب ہونے کے بعد ۱۷؍ نومبر کو انہیں ڈسچارج کیا گیا ہے۔‘‘مذکورہ کووڈ سینٹر سے ڈسچارج ہونے والے ایک پولیس اہلکار نے کہاکہ ’’جب کورونا سے متاثر ہونے کی تصدیق ہوئی تو مَیں گھبرا گیا تھا لیکن یہاں بہترین علاج کیا گیا اور وارڈ بوائے سے لے کر آئی سی یو کے ڈاکٹروں کی انتہائی بہترین نگہداشت سے آج میں صحت یاب ہو کر گھر لوٹ رہا ہوں۔ یہاں بالکل گھر جیسا ماحول ہے جس سے کوئی گھبراہٹ محسوس نہیں ہوتی۔‘‘
  کووڈ سینٹر کے کوآرڈی نیٹر ممتاز شاہ نے بتایا کہ ’’کووڈ سینٹر میں مشتبہ مریضوں کیلئے  علاحدہ جانچ کا  سینٹر بھی شروع کیا گیا ہے۔ اس سینٹر میں بخار اور دیگر علامتوں والے کووڈ کے مشتبہ مریضوں کی مفت جانچ کی جاتی ہے اور ضرورت پڑنے پر انہیں ۲، ۳؍ دنوں تک داخل بھی کیا جاتا ہے البتہ کووڈ سے متاثر نہ ہونے کی تصدیق کے بعد انہیں ڈسچارج کر دیاجاتا ہے۔اسی لئے عوام سے درخواست کی جاتی ہے کہ وہ   اس کووڈ سینٹر سے استفادہ کریں۔