اقوام متحدہ کے سیکریٹری جنرل نے دیگر مسائل کو درکنار کرتے ہوئے کورونا سے لڑنے پر زور دیا
EPAPER
Updated: August 30, 2020, 9:58 AM IST | Agency | Geneva
اقوام متحدہ کے سیکریٹری جنرل نے دیگر مسائل کو درکنار کرتے ہوئے کورونا سے لڑنے پر زور دیا
اقوام متحدہ کے سیکریٹری جنرل انتونیو غطریس نےکہا ہے کہ شورش زدہ اور تنازعات میں گھرے ممالک کو کوروناوائرس کی روک تھام کی طرف خاص توجہ دینی چاہئے اور اس میدان میں اپنی کوششیں تیزکرنی چاہئے۔ غطریس نے یہ بات ایک ٹی وی چینل کو دئیے گئے انٹرویو میں کہی۔
غطریس نے کہا’’ میری تمام شورش زدہ ممالک سے اپیل ہے کہ ہم یہ سمجھیں کہ ہمارا ایک ہی دشمن ہے اور وہ ہےکورونا وائرس ۔‘‘ انہوں نے کہا’’ ہمیں دیگر تمام تنازعات کو روکنا ہوگا اور اس (کورونا وائرس)سے لڑنے کی کوششوں پر توجہ دینی ہوگی ۔‘‘ اس دوران ایک سوال کے جواب میں اقوام متحدہ کےسیکریٹری جنرل نے اس بات کی تصدیق کی کہ انہوں نے یمن کے تعلق سے ریاض معاہدے کی حمایت کی ہے۔ انہوں نے کہا کہ ’’یمن کے بارے میں مذاکرات جاری ہیں اوراس میں اہم پیش رفت ہوئی ہے اور مذاکرات آخری مراحل میں داخل ہوگئے ہیں۔‘‘
انتونیو غطریس نے کہا کہ’’ ہم ریاض معاہدے کےحامی رہے ہیں اور مجھے امید ہے کہ فریقین مل کر مذاکرات کریں گے اور یمن کے وسیع تر مفاد میں فیصلے کریں گے۔‘‘ اس کے علاوہ غطریس نے لیبیا میں جاری محاذ آرائی روکنے، بیرونی مداخلت بند کرنے اور جنگجو فریقین کے درمیان جنگ بندی کے بعد تعمیری اور بامقصد بات چیت کی فوری ضرورت پر زور دیا۔
واضح رہے کہ لیبیا اور یمن دونوں ہی ممالک میں خانہ جنگی جاری ہے اور ایسی صورت میں یہاں کورونا وائرس پر توجہ دینا مشکل ہو رہا ہے۔ اسی فہرست میں شام کا نام بھی شامل ہے۔