ایشیا پاور انڈیکس ۲۰۲۵ء کے مطابق ہندوستان نے مضبوط اقتصادی ترقی، بڑھتی ہوئی فوجی صلاحیت اور آپریشن سندور میں کارکردگی کی بنیاد پر پہلی مرتبہ ’’بڑی طاقت‘‘ کا درجہ حاصل کر لیا ہے۔ عالمی درجہ بندی میں ہندوستان، امریکہ اور چین کے بعد تیسرے نمبر پر ہے جبکہ پاکستان ۱۶؍ ویں مقام پر ہے۔ رپورٹ کے مطابق ہندوستان فوجی سپر پاور بننے کے دہانے پر ہے۔

ہندوستان نے اپنی مضبوط معاشی ترقی، بڑھتی ہوئی فوجی صلاحیت اور آپریشن سندور میں نمایاں کارکردگی کی بنیاد پر ایشیا پاور انڈیکس ۲۰۲۵ء میں ’’بڑی طاقت‘‘ کا درجہ حاصل کر لیا ہے۔ اس اہم پیش رفت کے ساتھ ہندوستان عالمی سطح پر مجموعی طاقت کے لحاظ سے تیسرے نمبر پر آگیا ہے جبکہ پہلے دو مقامات امریکہ اور چین نے حاصل کئے ہیں۔ آسٹریلیا کے تھنک ٹینک لوئی انسٹی ٹیوٹ کی جانب سے جاری کردہ تازہ ترین رپورٹ میں ایشیا کی ریاستوں کی طاقت، اثر و رسوخ اور وسائل کا تجزیہ کیا گیا۔ رپورٹ کے مطابق ۲۰۲۵ء میں جامع طاقت کی بنیاد پر سرفہرست پانچ ممالک امریکہ، چین، ہندوستان، جاپان اور روس ہیں۔ اگرچہ امریکہ نے پہلی پوزیشن برقرار رکھی ہے لیکن ۲۰۱۸ء میں انڈیکس کے آغاز کے بعد اس کی مجموعی طاقت میں نمایاں کمی دیکھنے میں آئی ہے۔

یہ بھی پڑھئے: ۵؍ سال کی قیدو بند کے بعد ۶؍ مسلم نوجوان دہلی فساد کے کیس سے بری

پاکستان کی پوزیشن
ہندوستان کے ہمسائے پاکستان کو ٹاپ ٹین میں جگہ نہیں مل سکی ہے اور وہ ۱۶؍ ویں مقام پر ہے۔ 

ہندوستان اور چین کا موازنہ
رپورٹ میں کہا گیا ہے کہ ہندوستان کے عزائم اور اس کے حقیقی اثر و رسوخ میں اب بھی خلا موجود ہے، خاص طور پر چین کے مقابلے میں۔ اس کے باوجود نئی دہلی نے ۴۰؍ کے اسکور کے ساتھ تیسری پوزیشن حاصل کی جبکہ امریکہ کا اسکور ۴۰ء۸۰؍ اور چین کا ۵ء۷۳؍  رہا۔ ہندوستان نے جاپان پر اپنی معمولی برتری کو بھی مزید بڑھایا ہے، اور ۲۰۲۵ء میں اس کے اسکور میں ۹ء۰؍ پوائنٹس کا اضافہ ہوا ہے۔

ہندوستان فوجی سپر پاور کے قریب
درجہ بندی کے مطابق اگر ہندوستان ۴۰؍ کے اسکور کی حد پار کر لیتا ہے تو وہ فوجی سپر پاور کہلانے کے اہل ہو جائے گا۔ گزشتہ سال یعنی ایشیا پاور انڈیکس ۲۰۲۴ء میں ہندوستان کو ۱ء۳۸؍ اسکور کے ساتھ ’’درمیانی طاقت‘‘ کے طور پر درجہ دیا گیا تھا، لیکن اب اس نے ’’بڑی طاقت‘‘ کی دہلیز عبور کر لی ہے۔

ہندوستان کی اقتصادی بہتری بھی نمایاں
لوئی انسٹی ٹیوٹ کی رپورٹ کے مطابق ۲۰۱۸ء کے بعد پہلی بار ہندوستان کی اقتصادی تعلقات کی درجہ بندی میں بھی اضافہ ریکارڈ کیا گیا ہے۔ رپورٹ میں کہا گیا ہے کہ ’’ایشیا پاور انڈیکس ۲۰۲۵ء میں ہندوستان کی اقتصادی اور فوجی صلاحیتوں میں اضافہ ہوا ہے۔ معیشت مضبوط رفتار سے آگے بڑھ رہی ہے، اور جیوپولیٹیکل اثر و رسوخ میں بھی ہندوستان نے چھوٹے مگر اہم فوائد حاصل کئے ہیں۔ ٹیکنالوجی اور رابطے کے شعبوں میں بھی مستقل بہتری دیکھنے میں آئی ہے۔‘‘

یہ بھی پڑھئے: شملہ: سنجولی مسجد کے باہر جمعہ کو پھر ہنگامہ آرائی

آپریشن سندور کا اثر
رپورٹ کے مطابق ہندوستان کی فوجی صلاحیت میں بہتری کی بڑی وجہ آپریشن سندور ہے، جو ۷؍ مئی ۲۰۲۵ء کو پہلگام، جموں کشمیر میں دہشت گردانہ حملے کے بعد شروع کیا گیا۔ جوابی کارروائی کے طور پر ہندوستانی مسلح افواج نے پاکستان اور پاکستان کے زیرِ انتظام کشمیر میں دہشت گردوں کے نو ٹھکانوں کو نشانہ بنا کر درست حملے کئے۔ انسٹی ٹیوٹ کے مطابق، ’’یہ کامیابیاں ہندوستان کی فوجی صلاحیت کے بارے میں بہتر عالمی جائزوں کی وجہ بنیں، جنہیں مئی ۲۰۲۵ء کے آپریشن سندور میں ہندوستان کی کارکردگی نے مزید تقویت دی اور اس کے جنگی تجربے میں اضافہ کیا۔‘‘