نظام پور کے کارپوریٹربہاء الدین نے انتباہ دیا کہ عید الاضحی سے قبل صفائی میں تساہلی کی گئی توکارپوریشن کے سامنے کچرے کا انبار لگادیں گے

یہاں عید الا ضحی سے قبل صاف صفائی اور کچرااُٹھانے میں تساہلی سے برہم کارپوریٹر فراز بہاءالدین نےمیونسپل کارپوریشن کے صدر دروازے پر کچراپھینک کرشدید احتجاج کیا۔ فرازبہاءالدین نے انتباہ دیا کہ اگر آج شام سے شہر کا کچرا اُٹھنا شروع نہیں ہوا تو وہ کارپوریشن کے سامنے کچرے کاڈھیر لگادیں گے۔ ڈپٹی میونسپل کمشنر(ہیڈ کواٹرز)دیپک ساونت نے یقین دلایا کہ بدھ کی شام سے ہی شہر سے کچرا اُٹھنا شروع ہوجائے گا۔
 انقلاب سے گفتگو کرتے ہوئے کارپوریٹر فرازبہاءالدین (بابا)نے بتایا کہ میونسپل کارپوریشن نے شہر سے کچرا اُٹھا کر ڈمپنگ گراؤنڈ میں پھینکنے والی گھنٹہ گاڑی کےٹھیکیداروں کا ۵؍سے۶؍ماہ کا بل روک دیا ہےجس پر احتجاج کرتےہوئےگھنٹہ گاڑی ٹھیکیداروں نے ۱۰؍روز قبل ایک روز کی علامتی ہڑتال کرکے کارپوریشن کو وارننگ دی تھی کہ اگر ان کی ادائیگی نہیں کی گئی تو وہ ہڑتال پر چلے جائیں۔انہوں نے کہا کہ عیدالاضحی کاتہوار سر پر ہونے کے سبب میںنے میونسپل کمشنر ڈاکٹر پنکج آشیاسے درخواست کی کہ آپ کسی بھی طرح سے یہ ہڑتال نہ ہونے دیں۔پیر کی شام بھی میں نےکمشنر صاحب کو فون کرکے بتایاکہ منگل سے گھنٹہ گاڑی کے ٹھیکیدار ہڑتال پر جارہے ہیں۔اس وقت بھی کمشنر نے یقین دلایا کہ ایسا کچھ نہیں ہوگا۔لیکن منگل سے گھنٹہ گاڑیوں نے شہر سے کچرا اُٹھانا بند کردیا۔منگل اور بدھ ۲؍دنوں سے کچرا نہ اُٹھانے سے شہر میںہرجانب کچرے کے ڈھیر لگنا شروع ہوگئے ہیں۔ جس کے سبب شہر میں گندگی اور تعفن بڑھ گیا ہے ۔شہر جیسے کچرے کی کنڈی میں تبدیل ہوتا جارہا ہے۔عید سر پر ہونےکے باوجود جب میونسپل کارپوریشن نے کچرے کو اُٹھانے کیلئے کوئی اقدام نہیں کیا تومیں نے آج کارپوریشن کےصدردروازے پر کچرا پھینک کر انتظامیہ کو بیدار کرنے کی کوشش کی۔کارپوریٹرفراز بابا نے بتایا کہ ان کے احتجاج پر ڈپٹی میونسپل کمشنر(ہیڈ کواٹرز)دیپک ساونت نے یقین دلایا ہے کہ آج شام۴؍بجے سے شہر کا کچرا اُٹھنا شروع ہوجائے گا۔انہوں نے انتباہ دیا کہ اگر شہر سے کچرا صاف نہیں کیاگیا تو وہ کارپوریشن کے سامنے کچرے کا ڈھیر لگا کر احتجاج کریں گے۔