دس ؍ منٹ کی مختصر ملاقات کے بعد فی الحال کسی بھی سیاسی جماعت میں شامل ہونے سے انکار کیا ۔ وزیرا علیٰ کی تعریف کی اور ان کا شکریہ ادا کیا
EPAPER
Updated: September 27, 2020, 4:46 AM IST | Agency | Patna
دس ؍ منٹ کی مختصر ملاقات کے بعد فی الحال کسی بھی سیاسی جماعت میں شامل ہونے سے انکار کیا ۔ وزیرا علیٰ کی تعریف کی اور ان کا شکریہ ادا کیا
بہار کے ڈی جی پی کے عہدے سے رضاکارانہ طور پر سبکدوش ہونے والے گپتیشور پانڈے نے سنیچر کوجے ڈی یو کے قومی صدر اور بہار کے وزیر اعلیٰ نتیش کمار سے ملاقات کی۔انڈین پولیس سروس (آئی پی ایس) کے۱۹۸۷ء بیچ کے افسر پانڈے نے جے ڈی یو کے ریاستی دفتر میں پارٹی کے قومی صدر اور بہار کے وزیر اعلی نتیش کمار سے ملاقات کے بعد صحافیوں کو بتایا کہ نتیش کمار سے ان کی دوستانہ ملاقات تھی۔ جب ان سے پوچھا گیا کہ کیا وہ جے ڈی یو میں شامل ہورہے ہیں تو انہوں نے کہا کہ وہ ابھی کسی پارٹی میں شامل نہیں ہو رہے ہیں۔
پانڈے نے یہ بھی کہاـ: ’’میں وزیراعلی کمار کا شکریہ ادا کرنے آیا تھا۔ ڈی جی پی کے عہدے پر رہتے ہوئے انہوں نے مجھے کھل کر کام کرنے کا موقع فراہم کیا۔‘‘ انہوں نے ایک سوال کے جواب میں کہا :’’ ابھی الیکشن لڑنے سے متعلق کوئی فیصلہ نہیں کیا ہوں۔ صرف باضابطہ طور پر وزیر اعلیٰ سے ملنے آیا تھا۔ ‘‘ پانڈے تقریباً ۱۰؍ منٹ جے ڈی یو کے دفتر میں رہے۔ اس دوران پارٹی کے کچھ دیگر سینئر لیڈر بھی موجود تھے۔واضح رہے کہ پانڈے کی انڈین پولیس سروس سے رضاکارانہ سبکدوشی کی درخواست کو محکمۂ داخلہ نے۲۲؍ ستمبر ۲۰۲۰ء کو گورنر کے حکم سے منظور کرلیا تھا۔ اس کے بعد سے یہ کہا جارہا ہے کہ پانڈے اب سرگرم سیاست میں حصہ لیں گے ۔ پانڈے نے محکمہ پولیس میں۳۳؍ سال خدمات انجام دیں۔ اس دوران انہوں نے سپرنٹنڈنٹ پولیس سے لے کر ڈپٹی انسپکٹر جنرل پولیس، انسپکٹر جنرل، ایڈیشنل ڈائریکٹر جنرل پولیس اور پولیس کے ڈائریکٹر جنرل تک کے سفر میں۲۶؍ اضلاع میں کام کیا۔ پانڈے کو۳۱؍ جنوری۲۰۱۹ء کو بہار کا ڈائریکٹر جنرل آف پولیس بنا دیا گیا تھا اور ان کی مدت ۲۸؍ فروری۲۰۲۱ء کو پوری ہونی تھی۔