چیتا کیمپ کے مقبول عام سالانہ کرکٹ مقابلے’’محمد ہارون سنجر، غلام احمد خاں آرزو میمورئیل کرکٹ ٹورنامنٹ‘‘ کے خطاب پر مقامی ٹیم بلیو ڈائمنڈ اسپورٹس کلب نے قبضہ جمالیا۔

ممبئی : چیتاکیمپ کے مقبول عام سالانہ کرکٹ مقابلے’’محمد ہارون سنجر، غلام احمد خاں آرزو میمورئیل کرکٹ ٹورنامنٹ‘‘  کے خطاب پر  مقامی ٹیم بلیو ڈائمنڈ اسپورٹس کلب نے قبضہ جمالیا۔ انتہائی سنسنی خیز فائنل مقابلے میں اس نے کرلا کی آصف الیون کو میچ کے آخری اوور کی آخری گیند پر ایک رن بنا کر شکست دی۔  اس موقع پر میدان میں شائقین کا جم غفیر موجود تھا۔ واضح رہے کہ بلیو ڈائمنڈ شروع سے ہی مقابلہ میں ناظرین کی توجہ کا مرکز رہی تھی۔ 
 پہلے بلے بازی کرتے ہوئے آصف الیون نے ۳؍ اوور میں۲۹؍ رن بنائے تھے ، چونکہ دھندلکا چھانے لگاتھا اس لئے یہ ہدف بلیوڈائمنڈ کیلئے مشکل سمجھا جارہاتھا تاہم   ’مین آف دی ٹورنامنٹ ‘ کا خطاب جیتنے والے اس کے بلے باز  پپو جی نے اپنی دھواں دار بیٹنگ سے اپنی ٹیم کی نیا کو پار لگانے میں اہم کردار ادا کیا۔ فائنل جیسے مقابلہ میں انہوں نے   ریورس سویپ کے ذریعے   چھکا لگا کر پورے میدان میں کھلبلی مچا دی۔ ٹورنامنٹ کے بیسٹ بالر کا خطاب نوراسک کے ملنگا کو دیا گیا جبکہ بلیو ڈائمنڈ کے زبیر علی بیسٹ  فیلڈر کے حق دار قرار دیئے گئے۔ مدنی کے توصیف حنیف عالم کو بیسٹ وکٹ کیپر، فیروز الیون کے رام اور رفیق اور آصف الیون کے مشتاق قریشی کو بیسٹ بالر کا خطاب دیا گیا۔ ٹورنامنٹ کے چیف آرگنائزر جمال سنجر اور جلال سنجر نے بتایا کہ فائنل مقابلہ کے موقع پر  راجیہ سبھا کے رکن حسین دلوائی، رکن اسمبلی ابوعاصم اعظمی ، مقامی ایم پی راہل شیوالے، روزنامہ ہندوستان کے ایڈیٹر سرفراز آرزو، ہم آپ کے ایڈیٹر سید جلال الدین  اور دیگر نے شرکت کی اور نوجوانوں کی حوصلہ افزائی کی۔ یاد رہے کہ اس ٹورنامنٹ کاآغاز ۴۱؍ سال قبل  محمد ہارون سنجر نے کیاتھا جو تب سے اب تک بلا ناغہ ہر سال یوم جمہوریہ کے موقع پر منعقد ہوتاہے۔