کانگریس نے الزام لگایا ہے کہ آسام اسمبلی  کے پہلے مرحلے  کے انتخابات میں یقینی شکست دیکھ کر بھارتیہ جنتا پارٹی  میں گھبراہٹ  ہے اور اس نے لوگوں کو خوش کرنے کے لئے نئے ہتھکنڈوں کو اپنانا شروع کردیا ہے۔

کانگریس نے الزام لگایا ہے کہ آسام اسمبلی  کے پہلے مرحلے  کے انتخابات میں یقینی شکست دیکھ کر بھارتیہ جنتا پارٹی  میں گھبراہٹ  ہے اور اس نے لوگوں کو خوش کرنے کے لئے نئے ہتھکنڈوں کو اپنانا شروع کردیا ہے۔
کانگریس کے  مواصلات محکمے کے سربراہ رندیپ سنگھ سرجے والا نے اتوار کے روز یہاں پریس کانفرنس میں کہا کہ بی جے پی اپنی شکست پر پریشان ہے۔ اس نے لوگوں سے کئے گئے وعدے پورے نہیں کیے ، لہذا شکست دیکھ کر وہ بے چین ہو گئی۔
انہوں نے کہا کہ اس بے چینی  کا نتیجہ ہے کہ پارٹی نے آسام ٹریبیون اخبار کا پہلا صفحہ خریدلیا ہے اور اسے اشتہار کے طور پر استعمال کررہی ہے۔ اس طرح سے بی جے پی قوانین کی خلاف ورزی کررہی ہے اوراس کے خلاف کارروائی ہونی چاہئے۔
انہوں نے کہا کہ یہ اشتہار  قوانین کے خلاف ہیں اور آسام کے وزیر اعلی سربانند سونووال ، ریاستی بی جے پی صدر رنجیت کمار داس اور پارٹی کے قومی صدر جے پی نڈا کے خلاف ایف آئی آر درج کی جانی چاہئے۔ نیز میڈیا کو ہدایت دی جائے کہ وہ اس طرح سے ضابطوں  کی خلاف ورزی نہ کریں۔