بی جے پی لیڈر ونیت اگروال کی برادران وطن سے اپیل ،یہاں تک کہا کہ اپنے بچوں کو ہتھیار چلانے کی تربیت بھی دیں
EPAPER
Updated: January 28, 2021, 10:00 AM IST | Agency | Meerut
بی جے پی لیڈر ونیت اگروال کی برادران وطن سے اپیل ،یہاں تک کہا کہ اپنے بچوں کو ہتھیار چلانے کی تربیت بھی دیں
مسلم دشمنی میں بی جے پی اور آر ایس ایس کے لیڈر کس قدر نفرت انگیز بیان بازی کر سکتے ہیں اس کی مثال میرٹھ شہر میں اس وقت نظر آئی جب بی جے پی کے ایک لیڈر نے ہندوؤں کو مسلمانوں اور پاکستان کا خوف دکھا کر ۵؍بچے پیدا کرنے کی صلاح دی۔بی جے پی کے شعبہ تجارت کے ریاستی کنوینر ونیت اگروال شاردا نے یومِ جمہوریہ کے موقع پر پرچم کشائی کے دوران ’ہم دو، ہمارے پانچ‘ کا نعرہ دیا اور یہاں تک کہہ ڈالا کہ اپنے بچوں کو لوہا (ہتھیار) خریدنا اور چلانا سکھائیے۔ انہوں نے کہا کہ جب تک دو بچے پیدا کرنے کا اصول نافذ نہیں ہوتا تب تک پانچ بچے پیدا کرنے کا عہد لیں۔ انہوں نے کہا، ’’یا تو ان کے بھی دو، ہمارے بھی دو ہونے چاہئیں یا پھر ہم دو، ہمارے پانچ کا عہد کریں۔‘‘
بی جے پی لیڈرونیت اگروال نے پانچ بچوں میں سے ہر ایک کو کس کام پر لگایا جانا چاہئے یہ بھی بتایا۔ انہوں نے کہا کہ پڑھا لکھا بچہ سیاست میں جائے۔ ایک بچے کو عزت و آبرو کی حفاظت کے لئے لوہا خریدنا اور چلانا سکھائیے۔ ایک بچے کو فوج میں بھیجیں، ایک بچے کو کاروبار میں لگائیں اور ایک بچے کو آئی اے ایس یا آئی پی ایس بنا کر ملک کی خدمت میں لگائیے۔ ونیت شاردا نے کہا کہ جمہوریت کے جشن کا دن ہے۔ اس دن یا تو ہم دو ہمارے دو یا پھر ہم ۲؍ ہمارے ۵؍ کا اصول حکومت سب کے لئے بنا دے، یا پھر ہم آج عہد کریں کہ ہم دو ہمارے پانچ پر عمل کریں گے۔انہوں نے کہا کہ راجہ دشرتھ کے چار بیٹے تھے۔ اگر ان کے چار بیٹے نہیں ہوتے تو راون کے راج کا اختتام نہیں ہوتا۔ اس لئے ملک کو ہم دو ہمارے پانچ کی ضرورت ہے۔