اقوام متحدہ کا صہیونی ریاست کے بدوئوں کے خلاف اقدام پر اظہار تشویش
EPAPER
Updated: February 28, 2021, 2:12 PM IST | Agency | Geneva
اقوام متحدہ کا صہیونی ریاست کے بدوئوں کے خلاف اقدام پر اظہار تشویش
اقوام متحدہ نے سلامتی کونسل میں یورپی ممالک کے ساتھ مل کر اسرائیل سے مطالبہ کیا ہے کہ وہ وادیٔ اردن میں بدوؤں کی بستی منہدم کرنے کا سلسلہ روک دے۔ ساتھ ہی اس بات پر بھی زور دیا گیا ہے کہ حمصہ البقیع کے علاقے میں انسانی امداد پہنچانے کی اجازت دی جائے۔یہ موقف جمعہ کے روز نیویارک میں سلامتی کونسل کے اجلاس کے دوران میں سامنے آیا۔ اجلاس کے اختتام پر اسٹونیا، فرانس، آئرلینڈ، ناروے اور برطانیہ نے باور کروایا کہ ’’اسرائیل کی جانب سے انہدام اور املاک ضبط کرنے کی حالیہ کارروائیوں کے حوالے سے ہمیں نہایت تشویش ہے۔ ان کارروائیوں میں وادی اردن کے علاقے حمصہ البقیع میں یورپی یونین اور ڈونرس گروپ کی فنڈنگ والی تنصیبات بھی لپیٹ میں آئی ہیں۔‘‘مذکورہ علاقے میں بدوؤں کی کمیونٹی تقر یبا ً ۷۰؍ افراد پر مشتمل ہے جن میں ۴۱؍بچے بھی شامل ہیں۔
خطے کیلئے اقوام متحدہ کے ناروے سے تعلق رکھنے والے ایلچی ٹور وینسلینڈ نے سلامتی کونسل کے سامنے انہدام اور ضبطی کی اسرائیلی کارروائیوں پر تشویش کا اظہار کیا۔ انہوں نے کہا کہ ’’اسرائیل نے حمصہ البقیع میں فلسطینی بدوؤں کی کمیونٹی کی ۸۰؍ عمارتیں منہدم یا ضبط کی ہیں۔ان کارر وائیوں کے سبب ۳۶؍ بچوں سمیت ۶۳؍ افراد نقل مکانی پر مجبور ہو گئے۔‘‘وینسلینڈ نے مزید کہا کہ ’’میں اسرائیل پر زور دیتا ہوں کہ وہ مشرقی بیت المقدس سمیت مقبوضہ مغربی کنارے کے تمام علاقوں میں فلسطینی املاک کو منہدم کرنے اور ضبط کرنے کا سلسلہ فوری طور پر روک دے۔‘‘