وزیر اعلیٰ اروند کیجریوال نےکورونا سے ٹھیک ہونے والے شہریوں سے اپیل کی کہ وہ پلازمہ عطیہ کریں تاکہ جانیں بچائی جاسکیں،۱۰۳۱؍ پر کال کیا جاسکتا ہے

دہلی میں کورونا وائرس کے مریضوں کے علاج کے لئے پلازمہ آسانی سے دستیاب کرانے کے لئے جمعرات کو دہلی میں ملک کا پہلا پلازمہ بینک شروع کیا گیا۔ وزیر اعلیٰ اروند کیجریوال نے اس کی شروعات کرتے ہوئے اس انفیکشن سے ٹھیک ہونے والے زیادہ سے زیادہ لوگوں سے آگے آنے اور پلازمہ کا عطیہ کرنے کی اپیل کی۔ انہوں نے کہا کہ جب تک کورونا ویکسین متعارف نہیں کروائی جاتی، پلازمہ تھیراپی  اس وائرس کے علاج میں بہت مددگار ثابت ہوسکتی ہے۔کیجریوال نے کہا کہ ’’یہ ملک کا پہلا پلازمہ بینک ہے۔ پلازمہ عطیہ کرنے کے خواہشمند افراد۱۰۳۱؍نمبر پر کال کرکے اپنی معلومات فراہم کر سکتے ہیں۔ اس کے علاوہ واٹس ایپ نمبر۸۸۰۰۰۰۷۷۲۲  پر بھی  خواہشمند افراد اپنا اندراج کروا سکتے ہیں ۔‘‘
  کیجریوال نے کہا کہ صرف وہی شخص پلازمہ عطیہ کرسکتا ہے  جسے کورونا ہوا ہو اور وہ اس سے صحت مند ہوچکا ہو۔ عطیہ دینے کے خواہشمند شخص کورونا سے کم سے کم ۱۴؍ دن پہلے ٹھیک ہو جانا چاہئے اور اس کی عمر۱۸؍ سے۶۰؍ سال کے درمیان ہونی چاہئے۔وزیر اعلیٰ نے کہا کہ ذیابیطس کے مریض پلازما نہیں دے سکتے۔ ساتھ ہی  وہ شخص جس کا بلڈ پریشر۱۴۰؍ سے زیادہ ہو پلازمہ نہیں دے سکتا۔ ہائپر ٹینشن کے مریض جن کا وزن ۵۰؍ کلو سے کم ہے، وہ عورت جو ایک بار حاملہ ہوئی ہو، کینسر سے صحت مند ہونے والے افراد، گردہ، دل اورجگر کی بیماری والے بھی پلازمہ نہیں دے سکتے۔
  کیجریوال نے بتایا کہ پلازمہ دینے کے عمل میں ۴۵؍ منٹ سے ایک گھنٹہ لگتا ہے۔وزیر اعلیٰ نے کورونا انفیکشن سے متاثرہ صحت مند لوگوں سے اپیل کرتے ہوئے کہا کہ جو شخص کورونا انفیکشن سے صحت مند ہوچکے ہیں ان سے میری  ہاتھ جوڑ کر میری درخواست ہے کہ پلازمہ عطیہ کریں تاکہ زیادہ سے زیادہ مریضوں کی جانی بچائی جاسکے۔ کسی کی جان بچانے  کاموقع بہت مشکل  سے ملتا ہے۔ آپ لوگوں کے پاس یہ موقع ہےاہم بات یہ ہے کہ دہلی کے وزیر صحت ستیندر جین کوحالت خراب ہونے پر پلازمہ تھیراپی  دی گئی تھی اور وہ صحت یاب ہوگئے۔