راہل کے مطابق لاک ڈائون کو ۶۰؍ دن سے زیادہ ہو گئے لیکن کورونا کے کیس کم ہونے کے بجائے بڑھتے جارہے ہیں ، معاشی پیکیج کا مطالبہ پھر دہرایا
EPAPER
Updated: May 27, 2020, 5:40 AM IST | Inquilab News Network | New Delhi
راہل کے مطابق لاک ڈائون کو ۶۰؍ دن سے زیادہ ہو گئے لیکن کورونا کے کیس کم ہونے کے بجائے بڑھتے جارہے ہیں ، معاشی پیکیج کا مطالبہ پھر دہرایا
دو مہینے کے لاک ڈائون کے باوجود جس تیزی سے کورونا پھیل رہا ہے اس پر اب اپوزیشن نے سوال قائم کرنے شروع کردئیے ہیں۔ اس سلسلے میں کانگریس کے سابق صدر راہل گاندھی نے سب سے پہلے لاک ڈائون کو ناکام قرار دیا اور حکومت سے پوچھا ہے کہ آگے اس کا کیا منصوبہ ہے کیوں کہ لاک ڈائون تو ناکام ہو چکا ہے۔ اے آئی سی سی کے زیر اہتمام ویڈیو کانفرنسنگ کے ذریعہ منعقدہ پریس کانفرنس سے خطاب کرتے ہوئے راہل گاندھی نے کہا کہ ۶۰؍ دن لاک ڈائون کو ہو گئے ہیں لیکن کورونا کے معاملات کم ہونے کےبجائے تیزی سے بڑھ رہے ہیں۔ حکومت کا لاک ڈائون تقریباً ناکام رہا ہے چنانچہ اب حکومت صاف صاف بتائے کہ اس وقت کیا صورتحال ہے ؟ آنے والے دنوں میں وہ کیا اقدام کرے گی ؟ وہ مزدوروں اور غریبوں کی مدد کیسے کرے گی ؟ اس کا مستقبل کا منصوبہ کیا ہے ؟ آج کی ہماری پریس کانفرنس کا مقصد یہی تھا کہ ہم حکومت سے اپوزیشن کی حیثیت سے معلوم کریںکہ آخر وہ کیا کر رہی ہے ۔
راہل نے کہا کہ ہم نہ تو کوئی تنقید کر رہے ہیں اور نہ ہی ماضی میں اٹھائے گئے اقدامات پر آنسو بہارہے ہیں بلکہ ہم تو حال کی بات کر رہے ہیں اور مستقبل کی منصوبہ بندی پر معلومات چاہتے ہیں۔ انہوں نے کہا کہ میں نے ۱۲؍ فروری ۲۰۲۰؍ کو متنبہ کیا تھا اور آج بھی اسی پر قائم ہوں کہ اگر حکومت نے پالیسی نہیں بنائی تو ہم بہت مشکل میں ہوں گے ۔