پی کے گوساوی پر پونے میں فریب دہی کا معاملہ درج ہے ،پولیس نے ملک بھر کے ایئر پورٹس کو بھی مطلع کیا۔آرین کے معاملے میں عدالت ۲۰؍ اکتوبر کو فیصلہ سنائے گی

: شاہ رخ خان کے بیٹے آرین خان کی گرفتاری کے وقت تفتیشی  این سی بی کے ساتھ ساتھ موجود رہنے والے اور آرین کے ساتھ سیلفی لے کر اسے وائرل کرنے والے پی کے گوساوی کے خلاف پونے پولیس نے لُک آئوٹ نوٹس جاری کردیا ہے۔ پولیس کے مطابق گوساوی کے خلاف فریب دہی کامعاملہ درج ہے او ر وہ خود کو پرائیویٹ جاسوس قرار دیتا ہےلیکن یہاں سے وہ فرار ہے اسی لئے اس کے خلاف نوٹس جاری کیا گیا ہے۔ ساتھ ہی تمام ایئر پورٹس کو بھی الرٹ کردیا گیا ہے تاکہ وہ ملک سے فرار نہ ہو سکے۔ این سی بی نے اس کے بارے میں پہلے دعویٰ کیا تھا کہ وہ آرین کیس کا آزاد گواہ ہے لیکن اس کے تعلق سے متعدد سنسنی خیز انکشافات ہونے کے بعد این سی بی نے اب چپی سادھ لی ہے۔ 
 گوساوی کے بارے میں پونے کے پولیس کمشنر امیتابھ گپتا نے بتایا کہ اس کے خلاف شہر کے فراش خانہ  پولیس اسٹیشن میں فریب دہی اور جعلی نوکری ریکیٹ چلانے کا معاملہ درج ہے۔ اس معاملے میں وہ ۲۰۱۸ء سے ہی مطلوب ہے۔ آرین خان کے ساتھ اس کی تصویر سامنےآنے کے بعد سے ہی اس کی تلاشی میں تیزی لائی گئی  ہے۔ گوساوی کے خلاف معاملہ درج کروانے والے کرن دیشمکھ نے بتایا کہ اس نے فیس بک پر اشتہار دیا تھا کہ وہ ملائیشیا میں ملازمت دلاسکتا ہے۔ اس کے بعد گوساوی نے کرن سے ۳؍ لاکھ روپے اینٹھ لئے تھے۔