تقریب حلف برداری کے دوران بی جےپی احتجاج کرتی رہی، اپنے کارکنوں پر حملوں  کے خلاف کارروائی کا مطالبہ

سمبلی الیکشن میں  بی جے پی کو پٹخنی دینے کےبعد  ممتا بنرجی نے بدھ کو تیسری مرتبہ ریاست کی وزیراعلیٰ کے طور پر حلف لے لیا۔ نئے سرے سے عہدہ سنبھالتے ہی انہوں  نے ریاست میں کورونا کی وبا اور نتائج کے اعلان کے بعد  پھوٹ پڑنے والے تشدد سے نمٹنے کا اعلان کیا ہے۔  انہوں   ان لوگوں کو قطعی نہ بخشنے کا انتباہ دیا جو  تشدد کی وارداتوں کے پس پشت ہیں۔ دوسری طرف  بی جےپی حلف برداری کی تقریب کے دوران اپنے دفتر میں احتجاج کرتی رہی۔ وہ اپنے کارکنوں  پر حملوں کے خلاف کارروائی کا مطالبہ کررہی تھی۔ 
 ممتا بنرجی کو ایک انتہائی سادہ سی تقریب میں گورنر جگدیپ دھنکر نے عہدہ اور راز داری کا حلف دلایا۔ ممتا بنرجی مغربی بنگال کی ۲۱؍ویں  وزیراعلیٰ  بن گئی ہیں۔ ریاست کی وزارت اعلیٰ  سنبھالنے والی وہ ۸؍ ویں شخصیت ہیں۔  ایک طرف جہاں  حلف برداری کی تقریب ہورہی تھی تو دوسری جانب ہیسٹنگ میں  بی جےپی  اپنے دفتر میں  احتجاج کررہی تھی۔اس کا الزام ہے کہ الیکشن کے نتائج کا اعلان ہونے کے بعد ٹی ایم سی کارکن اس  کے کارکنوں کو نشانہ بنارہے ہیں۔  بی جےپی کا دعویٰ ہے کہ ان حملوں میں کئی افراد مارے گئے ہیں۔ دوسری جانب  یہ بات بھی سامنے آئی ہے کہ حملوں کے نام پر سوشل میڈیا پر فرضی اور تشدد کی ماضی کی وارداتوں کے ویڈیو حالیہ ویڈیو کے طور پر چلائے جارہے ہیں۔ کولکاتا پولیس اس سلسلے میں  سرگرم ہوگئی ہے۔اس نے بی جےپی کے مہیلا مورچہ  کے سوشل میڈیا کی قومی انچارج پریتی گاندھی کے خلاف کیس بھی درج کرلیا ہے جنہوں  نے مبینہ طور پر آبروریزی کا کہیں اور کا ویڈیو بنگال کا بتا کر پوسٹ کیاتھا۔