میڈیا کی مجرمانہ خاموشی پر اُسے تبلیغی جماعت سےمتعلق اس کی رپورٹنگ یاد دلائی گئی، رام گوپال ورما نے تصویر شیئر کرکے کمبھ کو ’’کورونا ایٹم بم‘‘ کا نام دیا

ملک میں کورونا کی انتہائی خطرناک دوسری لہر کے بیچ اس سے بچاؤ  کے تمام اصولوں کو بالائے طاق رکھتےہوئے پیر کی شام تک ۲۸؍ لاکھ افراد نے دوسرے ’’شاہی اسنان‘‘ میں شرکت کی۔اس دوران یہاں پہنچنے  والے عقیدت مندوں کا نہ درجہ حرارت ناپا گیا، نہ ماسک استعمال ہوا اور نہ ہی آپسی دوری کا خیال رکھاگیا۔ 
 شاہی اسنان کی تصویریں منظر عام پر آنے کے بعد سوشل میڈیا پر ملک کے سمجھدار شہریوں نے شدید تشویش کااظہار کیا ہے۔  اس دوران میڈیا کی مجرمانہ خاموشی کو بھی نہ صرف محسوس کیاگیا بلکہ اسے یاد بھی دلایا گیا کہ گزشتہ سال تبلیغی جماعت کے مرکز کی چھوٹی سی بھیڑ کی اس نے کس طرح رپورٹنگ کی تھی۔ کمبھ کی بھیڑ پر تنقید کرنے والوں  میں مہیش بھٹ کی اہلیہ سونی رازدان اور  معروف فلم ساز رام گوپال ورما شامل ہیں۔ رام گوپال ورما نے کمبھ  کے شاہی اسنان کی تصویر شیئر کرتےہوئے اسے ’’کورونا ایٹم بم‘‘کا نام دیا اور سوال کیا کہ اس کی وجہ سے اگر کووڈ پھیلتا ہے تو اس کیلئے ذمہ دار کسی ٹھہرایا جائےگا۔