مہاراشٹرا اقلیتی امور کے وزیر نواب ملک نے گلوکار عدنان سمیع کو پدم شری دیئے جانے پر پیر کو بی جے پی کی زیرقیادت مرکزی حکومت پر طنز کیا اور کہا کہ یہ ہندوستانی عوام کی توہین ہے۔

ممبئی : مہاراشٹرا اقلیتی امور کے وزیر نواب ملک نے گلوکار عدنان سمیع کو پدم شری دیئے جانے پر پیر کو بی جے پی کی زیرقیادت مرکزی حکومت پر طنز کیا اور کہا کہ یہ ہندوستانی عوام کی توہین ہے۔
نواب ملک نے ایجنسی سے بات چیت کرتے ہوئے کہا کہ ملک بھر میں سی اے اے اور این آر سی کیخلاف احتجاج جاری ہے اور اس تعلق سے مودی حکومت کی شبیہ عالمی سطح پر بدنام ہوئی ہے۔ اس لئے عدنان سمیع کو پدم شری دینا اپنی ناکامیوں کو چھپانے سے زیادہ کچھ نہیں ہے۔
انہوںنے مزید کہا کہ یہ واضح ہو چکا ہے کہ اگر کوئی پاکستانی شہری وزیر اعظم مودی کے حق میں نعرے بلند کرتا ہے تو اسے ہندوستان کی شہریت اور پدم شری  دیا جاتا ہے۔ ملک نے کہا کہ کسی ’پاکستانی ‘کو ایوارڈ دینا ہندوستانی عوام کی توہین ہے۔ کیا ہندوستانی مسلم اس اہل نہیں کہ وہ پدم شری حاصل کریں؟ مودی حکومت یہ بتانا چاہتی ہے کہ وہ پاکستانی مسلم کو بھی شہریت اور پدم شری دے رہی ہے۔
واضح رہے کہ یوم جمہوریہ کے موقع پر پدما شری ایوارڈز کی فہرست جاری کی گئی تھی۔ ’پدم ‘ ایوارڈ کو تین زمرے میں دیا جاتا ہے۔ پدم وبھوشن، پدم بھوشن اور پدم شری۔ پدم وبھوشن ،بھارت رتن کے بعد دوسرااعلیٰ ترین شہری ایوارڈ ہے۔