آسام میں  چائے کے باغات کے مزدوروں سے راہل گاندھی کا وعدہ

کانگریس کے سابق صدر راہل گاندھی نے جمعہ کو آسام میں  انتخابی  ریلی سے خطاب کرتے ہوئے اعلان کیا ہے کہ اگر کانگریس  کی قیادت والا اتحاد ریاست میں  برسراقتدار  آتا ہے تو حکومت بننے کے ۶؍ گھنٹوں کے اندر اندر  چائے کے باغوں میں کام کرنے والے مزدوروں  کی مزدوری میں اضافہ کردیا جائےگا۔اس کے ساتھ ہی انہوں نے اپنے اس وعدے کو بھی دہرایا کہ اقتدار میں آنے پر کانگریس آسام میں سی اے اے کو نافذنہیں ہونے دے گی۔ 
  بی جےپی کو آسام کی ثقافت اور شناخت کے لئے خطرہ قرار دیتے ہوئے راہل گاندھی نے  کہا ہے کہ وہ آسام کو ناگپور سے چلانا چاہتی ہے اور ایک قوم اور ایک زبان کے اصول کو مسلط کرنا چاہتی ہے۔ تن سوکیا میں انتخابی اجلاس سے خطاب کرتے ہوئے راہل گاندھی نے کہا ہے کہ بی جےپی کے لوگ باہر ی  لوگوں کو لانا چاہتے ہیں اور اسے آپ کے ہوائی اڈہ کو دینا چاہتے ہیں۔ ہم لوگ آسام کو صرف آسام سے چلانا چاہتے ہیں۔ ہمار ے وزیراعلیٰ آسام کے لوگوں کی آواز  سن کر کام کریں گے اور ہم لوگ ناگپور کو کچھ بھی نہیں کرنے دیں گے۔