زرعی قوانین کے خلاف کسانوں کے احتجاج کی مار جھیل رہی ریلائنس انڈسٹریز نے اب عدالت کا دروازہ کھٹکھٹایا ہے۔ کمپنی نے جیو کے ٹاورس کو نقصان پہنچانے کے واقعات کا حوالہ دیتے ہوئے کورٹ سے اپیل کی ہے کہ وہ حکومت کواس کی املاک کے تحفظ کا حکم دے۔

زرعی قوانین کے خلاف کسانوں کے احتجاج کی مار جھیل رہی ریلائنس انڈسٹریز  نے اب عدالت کا دروازہ کھٹکھٹایا ہے۔ کمپنی نے جیو کے ٹاورس کو نقصان پہنچانے کے واقعات کا حوالہ دیتے ہوئے کورٹ سے اپیل کی ہے کہ وہ حکومت کواس کی املاک کے تحفظ کا حکم دے۔کمپنی نے ساتھ ہی  کورٹ میں صفائی بھی کی ہے کہ کنٹریکٹ فارمنگ کے شعبے میں داخل ہونے کا اس کا کوئی ارادہ نہیں ہے۔ 
  جس طرح مودی سرکار نے تینوں زرعی بل پاس کئے ہیں اوران میں مبینہ طورپر کارپوریٹ گھرانوں کے مفادات کو ترجیح دی ہے اس کی وجہ سے پورے ملک میں یہ تاثر ہے کہ حکومت اڈانی اور ریلائنس کو فائدہ پہنچانا چاہ رہی ہے۔اس کی وجہ سے کسانوں نے نہ صرف جیو کے سم کارڈس کے بائیکاٹ کی تحریک چھیڑ رکھی ہے بلکہ برہم کسانوں کی جانب سے جیو کے ٹاورس کو نشانہ بنانے،ان کی بجلی کاٹ دینے یا  انہیں نقصان پہنچانے  کے متعدد واقعات پیش آرہے ہیں۔ صرف پنجاب میں جیو کے ۹؍ ہزار ٹاورس میں سے ۱۵۰۰؍ کو نقصان پہنچایا جاچکاہے۔ ریلائنس  نے عدالت سے اپیل کی ہے کہ وہ حکومتوں  کوفوری طور پر ہدایت دے کہ ریلائنس کی املاک کو مزید نقصان نہ پہنچنے پائے۔ کمپنی نے ایک بیان میں  یہ بھی واضح کیا ہے کہ ’’ریلائنس انڈسٹریز یا اس کی کسی کمپنی نے نہ ماضی میں کارپوریٹ یا کنٹریٹ فارمنگ کی ہے اور مستقبل میں اس کا ایسا کوئی منصوبہ ہے۔‘‘