اسرائیلی میڈیا کے دعوے پر سفارتی حلقوں میں چہ میگوئیاں، دونوں ملک خاموش
EPAPER
Updated: November 24, 2020, 9:16 AM IST | Agency | Riyadh
اسرائیلی میڈیا کے دعوے پر سفارتی حلقوں میں چہ میگوئیاں، دونوں ملک خاموش
اسرائیلی میڈیا میں پیر کو آنے والی اس خبر نے سفارتی حلقوں میں سنسنی پھیلادی ہے کہ اتوار کو اسرائیلی وزیراعظم نیتن یاہو نے سعودی عرب پہنچ کر وہاں امریکی وزیر خارجہ مائیک پومپیو کی موجودگی میں ولی عہد محمد بن سلمان کے ساتھ خفیہ ملاقات کی۔ امریکی وزیر خارجہ مائیک پومپیو اس وقت یورپ اور مشرق وسطیٰ کے۸؍ ممالک کے دورے پر ہیں۔
اسرائیلی میڈیا کا دعویٰ ہے کہ وزیراعظم نیتن یاہو کے ساتھ اسرائیل کی بدنام زمانہ خفیہ ایجنسی موساد کے سربراہ یوسی کوہن بھی تھے۔ کہا جارہاہے کہ ۵؍ گھنٹے پر محیط اسرائیل اور سعودی عرب کے سربراہان کی یہ اعلیٰ سطحی ملاقات تبوک کے شہر نیوم میں ہوئی۔ یا درہے کہ اس سے کئی گھنٹے قبل امریکی وزیر خارجہ نے کہا تھا کہ ولی عہد سے ملاقات میں ایک بڑی کامیابی حاصل ہوئی ہے۔ پروازوں کا ڈیٹا رکھنے والی ویب سائٹ ’فلائٹ راڈار۲۴؍ڈاٹ کام‘ پر تل ابیب کے انٹرنیشنل ایئرپورٹ سے نجی جیٹ طیارے گلف اسٹریم چہارم کی۵؍ بجکر۴۰؍ منٹ پر پرواز بھرنے اور سعودی شہر نیوم میں لینڈنگ کرنے نیز ۵؍ گھنٹے بعد اسی راستے سے تل ابیب واپس لوٹنے کا ڈیٹا موجود ہے۔اسرائیلی وزیراعظم اور سعودی ولی عہد محمد بن سلمان کی ملاقات کی اس خبر کی اسرائیل، سعودی عرب یا امریکہ کی جانب سے نہ تو تردیدکی گئی ہے اور نہ ہی تصدیق ۔ ایسے وقت میں جب کئی عرب ممالک اسرائیل کو تسلیم کرچکے ہیں، یہ خبر اہمیت کی حامل ہے۔