اکیس گھنٹے کے مکمل شٹ ڈائون کے دو ران گھروں میں ہی عبادت کی گئی،قبرستان مقفل اور مسجدیں سنسان رہیں ، عوام کاانتظامیہ سے صد فیصد تعاون ۔
EPAPER
Updated: April 11, 2020, 6:18 AM IST | Mukhtar Adeel | Malegaon
اکیس گھنٹے کے مکمل شٹ ڈائون کے دو ران گھروں میں ہی عبادت کی گئی،قبرستان مقفل اور مسجدیں سنسان رہیں ، عوام کاانتظامیہ سے صد فیصد تعاون ۔
صنعتی شہر میں ۲۱؍ گھنٹے کے مکمل شٹ ڈائون کے دوران شبِ برأت منائی گئی۔ قبرستان مقفل، مسجدیں سنسان رہیں ۔ گھروں میں عبادت وریاضت کا اہتمام عمل میں آیا۔ سرکاری انتظامیہ کے ساتھ صد فیصد تعاون کا قابل تعریف اقدام شہریوں نے کیاہے۔ اس موقع پر۲۰۰۶ء بم دھماکہ کے شہداء کو بھی یاد کیا گیا۔ مہلوکین کے لواحقین اپنے عزیزوں کو یاد کرکے آبدیدہ ہوگئے۔ایڈیشنل ایس پی رتناکر نولے نے کہا کہ ’’مالیگائوں کے بڑاقبرستان میں سخت پولیس سیکیوریٹی لگائی تھی۔ سابقہ روایات کے مطابق اس مرتبہ بھی واچ ٹاور بنائے گئے۔ کئی حصوں میں خفیہ کیمرے نصب کئے گئے تھے۔‘‘انہوں نے کہا کہ ’’عوامی سطح پر زبردست تعاون ملا۔ پولیس انتظامیہ کی جانب سے ساری رات شہر کے قبرستانوں کی نگرانی جاری رہی۔ بڑاقبرستان، عائشہ نگر قبرستان، چھوٹا قبرستان وغیرہ میں ضابطے کی مکمل طور سے پاسداری عمل میں آئی۔‘‘ شہر کے علماء وملّی تنظیموں نے گھروں میں شب برأت کے اہتمام کی گزارش کی تھی۔ اس بنیاد پر مسلمانوں نے گھروں میں نمازیں ادا کیں اور دعائوں کا اہتمام کیا۔ شبِ برأت کے موقع پر بڑی تعداد بھکاری اور مانگنے والے مالیگائوں کا رُخ کرتے ہیں ۔
امسال لاک ڈائون کے سبب سیکڑوں بھکاری مالیگائوں نہیں آسکے۔ نورانی مسجد سے بڑاقبرستان تک بھکاریوں کی لائن لگاکرتی تھی لیکن یہ علاقہ اس سال سنسان پڑا رہا۔ کورونا وائرس سے متاثرہ مریضوں کے سامنے آنے کے بعد شہر میں سناٹے کا راج ہوگیا ہے۔ ضروری کام سے بھی باہر نکلنے کیلئے شہری ہمت نہیں کررہے ہیں ۔ شٹ ڈائون کے گہرے اثرات شہریوں کے معمولات پر دکھائی دیئے۔