نربھیا معاملے میں پھانسی کی سزا پائے ملزمین میں سے ایک مکیش سنگھ کی درخواست پر شنوائی کے دوران پیر کو سپریم کورٹ نے کہا کہ درخواست گزار کے وکیل کو جلد شنوائی کیلئے سپریم کورٹ رجسٹری کے پاس اپیل کریں۔

نئی دہلی : نربھیا معاملے میں پھانسی کی سزا پائے ملزمین میں سے ایک مکیش سنگھ کی درخواست پر شنوائی کے دوران پیر کو سپریم کورٹ نے کہا کہ درخواست گزار کے وکیل کو جلد شنوائی کیلئے سپریم کورٹ رجسٹری کے پاس اپیل کریں۔ چیف جسٹس آف سپریم کورٹ کی سربراہی میں بنچ نے کہا کہ اگر کسی کو یکم فروری کو پھانسی دینا ہے تو اس کی ترجیحی بنیادوں پر سماعت ہونی چاہئے۔
واضح رہے کہ ۲۰۱۲ء میں ہوئے نربھیا اجتماعی آبرو ریزی اور قتل معاملے میں موت کی سزا پائے ملزمین میں سے ایک مکیش سنگھ نے رحم کی درخواست خارج ہونے کے بعد صدر جمہوریہ کے فیصلے کو سپریم کورٹ میں چیلنج کیا ہے اور اس نے رحم کی درخواست خارج کرنے کیلئے عدالتی نظرثانی کی درخواست کی ہے۔ یہ درخواست مجرم مکیش کی جانب سے ایڈووکیٹ ورندا گروور کے ذریعہ دائر کی گئی ہے۔
یاد رہے کہ صدر جمہوریہ رام ناتھ سنگھ کووند نے ۱۷؍ جنوری کو مکیش سنگھ کی رحم کی درخواست خارج کر دی تھی۔ مکیش سنگھ کے وکیل ورندا گروور کے مطابق رحم کی درخواست خارج کرنے کے طریقے پر عدالتی جائزہ لینے کیلئے درخواست کو آرٹیکل ۳۲؍ کے تحت دائر کیا گیا ہے۔