عمرہ کے ویزا پر مملکت میں داخل ہونے والے افراد مکہ مکرمہ اور مدینہ منورہ کے علاوہ دیگر شہروں کا بھی سفر کرسکتے ہیں، عمرہ کی تعداد کی کوئی حد بھی مقرر نہیں
EPAPER
Updated: August 06, 2022, 12:06 PM IST | Agency | Riyadh
عمرہ کے ویزا پر مملکت میں داخل ہونے والے افراد مکہ مکرمہ اور مدینہ منورہ کے علاوہ دیگر شہروں کا بھی سفر کرسکتے ہیں، عمرہ کی تعداد کی کوئی حد بھی مقرر نہیں
حج کا موسم ختم ہوتے ہی سعودی عرب نے عمرہ کیلئے مملکت کا سفر کرنے والوں کیلئے منفی آر ٹی پی سی آر ٹیسٹ رپورٹ اور کورونا ٹیکہ کاری کی شرط کو ختم کرنے کا اعلان کیا ہے۔اس کے ساتھ ہی ایک ٹویٹ کے جواب میں مملکت سعودی عرب نے واضح کیا ہے کہ عمرہ کے سفر کی تعداد محدود نہیں کی گئی ہے۔
بین الاقوامی خبر رساں ایجنسیوں کے مطابق سعودی وزارت حج و عمرہ نے تصدیق کی ہے کہ دیگر ممالک سے آنے والے عمرہ زائرین کو مملکت میں داخلے کیلئے منفی آر ٹی پی آر سی ٹیسٹ کے نتائج دکھانا لازمی نہیں ہوگا۔ تاہم زائرین عمرہ کیلئے کووڈ میڈیکل انشورنس اسکیم حاصل کرنا لازمی ہے۔
حکام نے مزید بتایا کہ عمرہ زائرین سعودی عرب میں اپنے قیام کے دوران مکہ مکرمہ اور مدینہ منورہ کے علاوہ دیگر شہروں کا سفر بھی کر سکیں گے نیز وہ سعودی عرب میں۹۰؍ روز قیام کر سکتے ہیں۔
سعودی حکام نے بیت اللہ کے گرد لگی رکاوٹیں بھی گزشتہ دنوں ہٹا دی تھیں جس کے بعد تمام عازمین ِ عمرہ اور نمازی بیت اللہ کو چھونے کی سعادت حاصل کرسکتےہیں اور حجر اسود کو بوسہ بھی دے سکتے ہیں۔سعودی عرب کی وزارت حج وعمرہ کی طرف سے جاری ایک بیان میں کہا گیا ہے کہ عمرہ زائرین کسی بھی فضائی، زمینی یا سمندری راستے سے عمرہ کی سعادت حاصل کرنے لئے مملکت میں آسکتےہیں۔وزارت حج سے سوال کیاگیا تھا کہ کیا عمرہ کیلئے ایک ہی سال میں دوبارہ سفر کیا جا سکتا ہے؟ اس کے جواب میں ایک ٹویٹ میں وزارت حج نے واضح کیا کہ ایک ہی سال میں عمرہ کی ادائیگی کی سعادت بار بار حاصل کی جا سکتی ہے۔