مودی حکومت پر شیوسینا کا گہرا طنز، کہا کہ غلط پالیسیوں کی وجہ سےآج ملک کو ہاتھ پھیلانا پڑ رہا ہے
EPAPER
Updated: May 09, 2021, 9:16 AM IST | Mumbai
مودی حکومت پر شیوسینا کا گہرا طنز، کہا کہ غلط پالیسیوں کی وجہ سےآج ملک کو ہاتھ پھیلانا پڑ رہا ہے
ملک میں کورونا کے بحران سے نمٹنے میں مودی حکومت کی ناکامی پر اسے جم کر آڑےہاتھوں لیتےہوئے شیوسینا کے ترجمان اخبار سامنا نے سنیچر کو دوٹوک انداز میں کہا ہے کہ ملک اگر آج بچا ہوا ہے تو اس نظام کی وجہ سے جو نہر اور اندرا گاندھی نے بنادیاتھا۔ اخبار نے لکھاہے کہ ایسے وقت میں جبکہ ہندوستان پوری طرح سے خود پر منحصر ہونےکی کوشش کررہاہے، مودی حکومت کی غلط پالیسیوں کی وجہ سے اسے نیپال اور سری لنکا جیسےچھوٹےچھوٹےملکوں سے مدد مانگنی پڑ رہی ہے۔
اخبار کے مطابق’’صاف صاف نظر آرہاہے کہ ملک آج اس نظام کی وجہ سے چل رہاہے جو نہرو اور اندرا گاندھی نے بنادیاتھا۔ آج بہت سے چھوٹے اور غریب ملک ہندوستان کو مدد کی پیش کش کررہے ہیں پہلے پاکستان، روانڈااور کانگو جیسےملکوں کو دوسرے ممالک سے مدد مانگنی پڑتی تھی۔‘‘ واضح رہے کہ ہندوستان نے یو پی اے کے دور اقتدار میں کسی سے مدد نہ لینے کی پالیسی اپنائی تھی جسے مودی حکومت میں کورونا کے موجودہ بحران کے دوران بدلنا پڑ گیا ہے۔ شیوسینا کے ترجمان اخبار کے مطابق’’مگر موجودہ حکمرانوں کی غلط پالیسیوں کی وجہ سے ہندوستان کو آج ایسے حالات کا سامنا ہے۔‘‘ اخبار نے نہرو اور اندرا گاندھی کےدور میں بنائے گئے اداروں اور نظام کی تعریف کرتے ہوئے لکھا ہے کہ ’’ پنڈت نہرو، شاستری، اندرا گاندھی، راجیو گاندھی ، نرسمہا راؤ اور منموہن سنگھ کی سابقہ حکومتوں نے جو ترقیاتی کام کردیئے اور جو پروجیکٹ بنا دیئے تھے ان کی وجہ سے ملک آج بھی چل رہاہے۔ ‘‘ شیوسینا نے اس بات کی بھی مذمت کی ہےکہ ملک کو درپیش ایسے خراب حالات میں بھی مودی حکومت سینٹرل وِسٹا پروجیکٹ پر کام کررہی ہے۔