ریپبلکن پارٹی کے رکن رینڈ پال کی پیش کردہ قرار دار کو ۴۵؍ کے مقابلے ۵۵؍ ووٹوں سے رد کر دیا گیا

امریکی کانگریس ایوان بالا یعنی سینیٹ نے سابق صدر ڈونالڈ ٹرمپ کے خلاف مواخذہ عمل کو غیر آئینی قرار دینے کے ریپبلکن رکن رینڈ پال کی کوشش کو مسترد کردیا ہے۔ رینڈ پال نے سینیٹ میں ٹرمپ کے مواخذے کے عمل کو غیر آئینی قرار دیتے ہوئے ایک قرارداد پیش کی  تھی  جسے ۴۵؍ ووٹوں کے مقابلے ۵۵؍ ووٹوں فرق سے سینیٹ نے مسترد کر دیا۔ریپبلکن پارٹی کے سینیٹ کے رکن رینڈ پال نے کہا کہ ایوان میں ووٹنگ سے یہ اشارہ ملتا ہے کہ سابق صدر کو اب مشکل دور سے گزرنا پڑسکتاہے ۔ اس قرار داد میں یہ دعویٰ کیا گیا تھا کہ اب یہ کارروائی غیر آئینی ہے کیوں کہ صدر ٹرمپ کارروائی شروع ہونے سےقبل ہی قصر صدارت چھوڑ چکے ہیں اور اب وہ کسی بھی آئینی عہدہ پر نہیں ہیں۔ ایسے میں ان کے خلاف کوئی بھی کارروائی صرف ایک شہری کے خلاف کارروائی ہو گی جو کسی دیگر طرح سے بھی کی جاسکتی ہے اس کے لئے آئینی التزامات کی ضرورت نہیں ہے۔
 اس قرار داد میں یہ دعویٰ بھی کیاگیا تھا چونکہ سینیٹ میں ڈیموکریٹس کی اکثریت ہو گئی ہے اس لئے اب وہ اس کارروائی کی نگرانی کریں گے جبکہ موجودہ صورتحال میں اسے سپریم کورٹ کے چیف جسٹس کی نگرانی میں ہونا چاہئے لیکن یہ تمام باتیں سینیٹ میں مسترد کردی گئیں اور اس کے خلاف ہی ووٹنگ ہوئی ۔ 
  قابل  غور ہے کہ امریکہ کے کیپٹل ہل میں ۶؍ جنوری کوتشدد بھڑکانے کے الزام میں اس وقت کے امریکی صدر  ٹرمپ کے خلاف  مواخذہ کا عمل شروع کرنے کیلئے کارروائی جاری ہے۔