امریکی سینیٹر ایلزبتھ وارن نے اسرائیلی وزیر اعظم بنجامن نیتن یاہو پر تنقید کرتے ہوئے کہا کہ ’’وہ ایران جنگ کو غزہ پٹی کے انسانی بحران کی طرف سے توجہ ہٹانے کیلئے استعمال کر رہے ہیں۔ وہ سمجھتے ہیں کہ کوئی دیکھ نہیں رہا ہے، لیکن دنیا دیکھ رہی ہے۔‘‘

امریکی سینیٹر ایلزبتھ وارن نے جمعہ کو ایران کے ساتھ جنگ کو غزہ پٹی کے تباہ کن بحران سے توجہ ہٹانے کیلئے استعمال کرنے پر اسرائیل کے وزیر اعظم بنجامن نیتن یاہو پر تنقید کی۔ انہوں نے کہا کہ ’’اسرائیل کے وزیر اعظم یہ سمجھتے ہیں کہ وہ غزہ میں جو کر رہے ہیں وہ کوئی نہیں دیکھ رہا ہے جبکہ انہوں نے ایران پر بمباری جاری رکھی ہے۔ لوگ بھکمری کا سامنا کر رہے ہیں۔ ۵۵؍ ہزار افراد نے اپنی جانیں گنوائی ہیں۔ امدادی رضاکاروں  اور ڈاکٹروں کو سرحد سے دور کر دیا گیا ہے۔ خوراک کے منتظر معصوم افراد پر بمباری کی جارہی ہے۔ دنیا تمہیں دیکھ رہی ہے بنجامن نیتن یاہو۔‘‘

یہ بھی پڑھئے: غزہ میں غذائی امداد کے مرکز پر پھر فائرنگ، ۳۵؍ ہلاک

یاد رہے کہ جنگ بندی کے مطالبات کو ٹھکراتے ہوئے اسرائیلی فوج نے اکتوبر ۲۰۲۳ء کے بعد سے غزہ پر اپنی جارحیت برقرار رکھی ہے جس کے نتیجے میں اب تک ۵۵؍ ہزار ۷۰۰؍ افراد نے اپنی جانیں گنوائی ہیں جن میں زیادہ تر خواتین اوربچے شامل ہیں۔

انسانی حقوق کے اداروں اور اقوام متحدہ (یو این)  نے متعدد مرتبہ غزہ کے انسانی بحران کے تعلق سے خبردار کیا ہے جو تباہ کن ہوتا جارہا ہے۔