کانگریس لیڈر پرینکا گاندھی کا حکومت سے سوال ، کہا کہ سب سے زیادہ ویکسین کا پروڈکشن کرنے والےملک کا ایسا حال کیوں ہوا ؟
EPAPER
Updated: May 27, 2021, 8:14 AM IST | Lucknow
کانگریس لیڈر پرینکا گاندھی کا حکومت سے سوال ، کہا کہ سب سے زیادہ ویکسین کا پروڈکشن کرنے والےملک کا ایسا حال کیوں ہوا ؟
کانگریس کے جنرل سیکریٹری اور اترپردیش کانگریس کی انچارج پرینکا گاندھی نے مرکز کی مودی حکومت سے سوال کیا ہے کہ دنیا میں سب سے زیادہ ویکسین پیدا کرنے والے ممالک میں سے ایک ہندوستان آج دوسرے ممالک سے ویکسین منگوانےکی حالت میں آگیا ہے اور حکومت اسے حصولیابی کی طرح پیش کررہی ہے۔پرینکا گاندھی نے بی جے پی حکومت پر تنقیدیں کرنے کے لئے شروع کی گئی’’ذمہ دار کون ‘‘مہم کے تحت فیس بک وا ل پوسٹ کیا کہ گزشتہ۱۵؍اگست کو وزیر اعظم مودی نے لال قلعہ سے اپنی تقریر میں کہا تھا کہ ان کی حکومت نے ٹیکہ کاری کا پورا منصوبہ تیار کرلیا ہے۔ ملک کے ویکسین پروڈکشن اور ویکسین کے کاموں کی طوالت کی تاریخ کو دیکھتے ہوئے یہ یقین کرنا آسان تھا کہ مودی حکومت اس کام کو تو بہتر ڈھنگ سے کرے گی۔ آخر پنڈت جواہر لال نہرو نے۱۹۴۸ء میں چنئی میں ویکسین یونٹ اور ۱۹۵۲ء میں نیشنل انسٹی ٹیوٹ آف وائرولوجی پونے کا قیام کر کے ہندوستان کے ویکسین پروگرام کو ایک نئی اڑان دی تھی۔
پرینکا نے کہا کہ ہم نے کامیابی کے ساتھ چیچک، پولیو وغیرہ بیماریوں کو شکست دی ہے۔ان حصولیابیوں کو جان کر ملک بے فکر تھا کہ ویکسین کا مسئلہ ملک کے سامنے نہیں آئے گا لیکن تلخ سچائی ہے کہ وبا کے آغاز سے ہی ہندوستان میں ویکسین عام لوگوں کی زندگی بچانے کے اوزار کے بجائے وزیر اعظم کی ذاتی تشہیر کا سامان بن گئی اور اب حالت یہ ہے کہ ہمیں دیگر ممالک سے یہ منگوانا پڑ رہی ہے۔ اس کا ذمہ دار کون ہے ؟