بی ایس پی رکن پارلیمنٹ کے مطابق حکومت کانظام اپنے مخالفین کو جیل بھیجنے میں لگا رہا اور وکاس دوبے جیسے بد معاش سرعام گھومتے رہے
EPAPER
Updated: July 06, 2020, 5:03 AM IST | Agency | Kanpur
بی ایس پی رکن پارلیمنٹ کے مطابق حکومت کانظام اپنے مخالفین کو جیل بھیجنے میں لگا رہا اور وکاس دوبے جیسے بد معاش سرعام گھومتے رہے
بی ایس پی کے رکن پارلیمنٹ نے یو گی حکومت پر الزام عائد کیا کہ وہ اصل کام چھوڑ کر اپنے مخالفین کو گرفتار کر رہی ہے جس کے سب وکا س دوبے جیسے بد معاش آزاد ہیں اور ان کے حوصلے بلند ہیں۔
اس سلسلے میں بہوجن سماج پارٹی کے رکن پارلیمنٹ کنور دانش علی نے کہا ہے کہ اترپردیش کی یوگی حکومت کی ناکامی کی وجہ سے کانپور میں ۸؍ پولس اہلکاروں کی شہادت ہوگئی۔
امروہہ سے لوک سبھا رکن پارلیمنٹ دانش علی نے ٹویٹ کرکے اتوار کو اترپردیش حکومت کے طریقۂ کار پر سوال کھڑاکیا ہے۔ انہوں نے اپنے ٹویٹ میں لکھا: ’’ ہمارے بہادر جوان اترپردیش حکومت کی غلط پالیسیوں کے سبب کانپور میں شہید ہوئے ،اسی کا نتیجہ ہے کہ خطرناک بدمعاش وکاس دوبے کھلے عام گھومتا رہا۔دراصل حکومت کا پورا نظام صحافیوں، طلبہ، حقوق انسانی کے کارکنوں اوراپنے مخالفین کو جھوٹے مقدمات میں پھنسا کر جیل بھیجتا رہا ہے اور جرائم پیشہ عناصر کھلے عام گھومتے رہے۔
واضح رہے کہ ۳؍ جولائی کی رات قتل کے معاملے میں مطلوب وکاس دوبے کو گرفتار کرنے گئی پولیس کی ٹیم پر بدمعاشوں نے حملہ کردیا تھا۔ اس واردات میں ایک ڈپٹی سپرنٹنڈنٹ اور ایک تھانہ انچارج سمیت ۸؍جوان شہید ہوگئے تھے۔
اس سلسلے میں مقامی پولیس کا کہنا ہےکہ واردات کے کچھ ہی گھنٹوں کے اندر پولیس نے واردات میں ملوث وکاس کے ۲؍ رشتہ داروں کو مار گرایا تھا۔ دوبے کی تلاش میں پولیس کی ۵۰؍ سے زیادہ ٹیمیں ریاست کے مختلف اضلاع میں سرگرم ہوگئی ہیں۔ اس سلسلے میں۵؍ سو سے زائد موبائل فون کو سرویلانس پر رکھا گیا ہے، حالانکہ پولیس نے یہ نہیں بتایا کہ ورادات سے پہلے پولیس نے وکاس دوبے کو کنٹرول میں کرنے کیلئے کیا تھا؟