عدالت نے کہا کہ چند افسران اور انتظامیہ کے کچھ حصوں کی ناکامی یا ان کے ذریعہ اقدامات نہ کرنےسے یہ نتیجہ نہیں اخذ کیا جاسکتا کہ یہ اقلیتوں کے خلاف ریاستی حکومت کی منصوبہ بند سازش تھی یاتشدد کوسرکاری پشت پناہی حاصل تھی

گجرات فساد   سے متعلق  مودی اودیگر ۶۳؍ افراد کے خلاف داخل کی گئی ذکیہ جعفری کی پٹیشن کو سپریم کورٹ نے جمعہ کو یہ کہتے ہوئے خارج کردیا کہ محض اس بنیاد پر کہ چند افسران  نے کوتا ہی برتی  یا انتظامیہ کے کچھ حصوں  نے  ضروری اقدامات نہیں کئے، یہ نتیجہ اخذ نہیں کیا جاسکتا کہ  یہ اقلیتوں  کے خلاف ریاستی حکومت کی منصوبہ بندی سازش تھی یا یہ کہ تشدد کو سرکار کی پشت پناہی حاصل تھی۔ 
 عدالت نے گجرات کی  وسیع تر سازش  کے معاملے میں   ایس آئی ٹی کے ذریعہ  مودی اور ۶۳؍  افراد کو دی گئی کلین چٹ پر مہر لگاتے ہوئے مزید کہا کہ ایس آئی ٹی نےا س بات کی نشاندہی کی  ہے کہ کوتاہی اور اقدام نہ کرنے والے خاطی افسران کا نوٹس لیتے ہوئے ان کے خلاف مناسب سطح پر کارروائیاں ہوئی ہیں جن میں محکمہ جاتی تادیبی کارروائیاں  شامل ہیں۔ 
 جسٹس اے   ایم کھانولکر، جسٹس دنیش مہیشوری اور جسٹس سی ٹی روی کمار کی بنچ  کے مطابق’’اس طرح کی بے عملی یا کوتاہی مجرمانہ سازش رچنے کی تعریف پر کھری نہیں اترتی، اس کیلئے ضروری ہے کہ اس نوعیت کے جرم کی منصوبہ بندی اور ارتکاب میں شامل ہونے کے ثبوت کسی نہ کسی شکل میں سامنے لائے جائیں ۔ ‘‘ کورٹ نےاس معاملے میں ایس آئی ٹی کو بھی کلین چٹ دیتے ہوئے کہا ہے کہ ’’خصوصی تفتیشی ٹیم کو وہاں  ریاستی حکومت کی ناکامی کی جانچ کیلئے نہیں مامور کیا گیا تھا، اسے اس عدالت(سپریم کورٹ ) نے جو ذمہ داری سونپی تھی وہ یہ تھی کہ وہ(اعلیٰ سطحوں پر) گجرات فساد کی وسیع تر سازش کا پتہ لگائے۔‘‘
  عدالت نے یہ باتیں ذکیہ جعفری کے وکیل کپل سبل کی دلیلوں  کے جواب میں  کہیں۔انہوں  نے  فساد پر قابو پانے اور مناسب اقدامات کرنے  میں  پولیس افسران  اور ریاستی  انتظامیہ کی ناکامی کا  حوالہ دیا   تھا۔