آسٹریلیا کی ٹاپ ویمن کرکٹر ایلیسا ہیلی نے کہا کہ وہ روہت شرما سے ترغیب لیتی ہیں اور ہندوستانی اسٹار اوپنر کی طرح کھیل کے تینوں فارمیٹ میں شاندار کارکردگی پیش کرنا چاہتی ہیں۔

آسٹریلیا کی ٹاپ ویمن کرکٹر ایلیسا ہیلی نے کہا کہ وہ روہت شرما سے ترغیب لیتی ہیں اور ہندوستانی اسٹار اوپنر کی طرح کھیل کے تینوں فارمیٹ میں شاندار کارکردگی پیش کرنا چاہتی ہیں۔ وکٹ کیپر بیٹسمین ہیلی   ہندوستان کے خلاف۲۱؍ ستمبر سے شروع ہونے والی  سیریز کی تیاری کر رہی ہیں۔ آسٹریلوی خواتین ٹیم  ہندوستان  کے خلاف ۳؍ ون ڈے ، ایک ڈے نائٹ ٹیسٹ اور ۳؍ ٹی۲۰؍میچوں کی سیریز کھیلے گی۔ ہیلی نے اب تک صرف ۴؍ ٹیسٹ میچ کھیلے ہیں اور ان کا کہنا ہے کہ وہ ون ڈے کی طرح گلابی گیند کا میچ کھیلنا چاہیں گی جو کہ۳۰؍ستمبر سے۳؍اکتوبر تک کینبرا میں کھیلا جائے گا۔ہیلی نے سیریز کے آغاز پر فاکس کرکٹ شو میں کہا ’’یہ (گلابی بال ٹیسٹ) پیچیدہ ہوگا کیونکہ میں نے صرف ۴؍ ٹیسٹ میچ کھیلے ہیں ، اس لیے میں یہ نہیں کہوں گی کہ میں ٹیسٹ میچ کھیلنے میں آرام دہ ہوں۔‘‘ انہوں نے کہا  `کہ جہاں تک میرا تعلق ہے ، اس ٹیسٹ میں میری ون ڈے بیٹنگ سے زیادہ کچھ نہیں بدلے گا۔ میرے خیال میں اپنے آپ کو زیادہ وقت دینا (بیٹنگ کے لیے) لاجواب ہے۔ جدید ٹیسٹ میچ کو دیکھتے ہوئے ، یہ بہت بدل گیا ہے۔ میں روہت شرما جیسے کھلاڑی سے  ترغیب پاتی ہوں جو کہ دنیا کے سب سے خطرناک وائٹ بال بلے بازوں میں سے ایک ہیں، پھر بھی وہ ٹیسٹ کرکٹ میں واقعی کامیاب اوپنر ہیں۔ روہت نے ریڈ بال فارمیٹ میں بھی اپنی صلاحیت کو ثابت کیا ہے۔ بیٹنگ کا آغاز کرتے ہوئے روہت نے ہندوستانی ٹیم کے دورہ آسٹریلیا اور انگلینڈ کے دوران اہم کردار ادا کیا۔ ہیلی نے کہا کہ میں ان (روہت) کی طرح کھیلنا چاہتی  ہوں ، وہ کس طرح تمام فارمیٹس میں اپنی مہارت سے شاندار بلے بازی کرتے ہیں۔