شاویز اورمارٹن کے گول کے باوجود گول اوسط کے معاملے میں میکسین ٹیم پولینڈ سے پیچھے رہ گئی،۱۹۷۸ء کے بعد آخری۱۶؍میں پہنچنے میں ناکام

 ہینری مارٹن اور لوئی شاویز کے گول کی بدولت میکسیکو نے بھلے ہی سعودی عرب کے خلاف میچ ایک کے مقابلے۲؍گول سے جیت لیا ہے لیکن یہ کامیابی بھی اسے ناک آؤٹ مرحلے میں پہچانے میں ناکام ثابت ہوئی۔ایسا اس لئے ہوا کیوںکہ ایک دیگرمقابلے میں ارجنٹائنا نے پولینڈ کو دو صفر سے ہرادیا جس کی وجہ گول اوسط کے معاملے میں میکسیکوپولینڈ سے پیچھے رہ گیا۔قابل ذکر ہے کہ میکسیکو۱۹۷۸ء کے بعد پہلی بار گروپ مرحلے سے آگے کا سفر طے کرنے میں ناکام رہا۔
 میکسیکو کی فٹبال ٹیم گزشتہ ۷؍عالمی کپ میں آخری ۱۶؍میں جگہ بنانے میں کامیاب ہوئی تھی لیکن قطر میں جاری ورلڈ کپ میں اس کا سفر سعودی عرب پر فتح کے بعد ختم ہوگیا۔واضح رہے کہ میکسیکو کیلئے کھیل کے ۴۸؍ویں منٹ میں مارٹن نے پہلا گول کیا تھا۔اس کے ۴؍منٹ بعد ہی شاویز نے فری کک پر گول کرتے ہوئے ٹیم کا اسکور دو صفر کردیا۔
 میکسیکو نے کھیل کے آخری منٹوں میں ایک اور گول کرنے کی پوری کوشش کی لیکن کامیابی نہیں مل سکی۔دوسرے ہاف کے اسٹاپیج ٹائم میں سعودی عرب کے سلیم نے گول کرتے ہوئے اپنی ٹیم کی شکست کے فرق کو کچھ کم کریا۔اس میچ کو جیتنے کے باوجود میکسیکو کے شاویز اور دیگر کھلاڑی کافی مایوس نظر آئے۔شاویز نے کہا ’’ہمارے پاس کوالیفائی کرنے کا موقع تھا لیکن ہم ایسا نہیں کر سکے۔‘‘دوسری جانب اپنا پانچواں عالمی کپ کھیل رہے تجربہ کار گول کیپر گوئیلیرمو نے کہا کہ ’’ ہمیں ایک اور گول کی ضرورت تھی۔ہمارا مقصد اس مقابلے میں ۴؍سے ۵؍گول کرنے کا تھا۔ ٹورنامنٹ سے باہر ہونا شرمناک ہے۔‘‘