آسٹریلیاکے گریگ چیپل کا خیال ہے کہ راہل دراوڑ نوجوان ٹیلنٹ کو جلد ہی پہچاننے کی صلاحیت رکھتے ہیں

آسٹریلیا کے سابق کرکٹ کھلاڑی گریگ چیپل کا خیال ہے کہ ہندوستان کے سابق کرکٹر راہل دراوڑ نے آسٹریلیائی دماغوں کو پڑھ کر ہندوستان میں بہتر گھریلو کرکٹ ڈھانچہ تیار کیا ہے جو قومی ٹیم کےلئے لگاتار ایک سے بڑھ کر ایک شاندار کھلاڑی دے رہا ہے۔حالانکہ آسٹریلیا اس معاملے میں پیچھے ہوگیا ہے۔ گریگ چیپل نے کہا کہ نئے ٹیلنٹ کی شناخت میں ہندوستان نے آسٹریلیا اور انگلینڈ کو پیچھے چھوڑ دیا ہے۔ہندوستان نے اس معاملے میں کامیابی حاصل کی کیوںکہ راہل دراوڑ نے ہم سے بہت کچھ سیکھا اور آسٹریلیا کے گھریلو کرکٹ ڈھانچے کو قریب سے دیکھا اور اسے ہندوستان میں اپنایا۔دیکھا جائے تو ہم نوجوان کھلاڑیوں کو تیار کرنےمیں دنیا میں سب سے بہتر تھے اورانہیں مواقع فراہم کرتے ہوئے ان میں اعتماد پیدا کرتے تھے۔لیکن مجھے لگتا ہے کہ گزشتہ چند برسوں سے ہم نے اپنے نوجوان کھلاڑیوں کی پہچان کھو دی ہے ۔جہاں تک راہل دراوڑ کی بات ہے تو وہ کھلاڑیوں کو ذہنی طور پر مضبوط کرتے ہیں اور یہی وجہ ہے کہ ہندوستان کا نوجوان کھلاڑی موقع ملتے ہی قومی ٹیم کےلئے شاندار کارکردگی کا مظاہرہ کرتا ہے۔