رانی نے کہا کہ ہماری ٹیم میں تجربہ کار کھلاڑیوں کا ایک اچھا مجموعہ ہے جو جونیئر کھلاڑیوں کی رہنمائی کرتی ہیں ۔

ہندوستانی مردوں کی ہاکی ٹیم کے کپتان منپریت سنگھ اور خواتین ٹیم کی کپتان رانی کا ماننا ہے کہ ٹیم اگلے سال ٹوکیو اولمپکس میں میڈل حاصل کرسکتی ہے اور اس کیلئے ان کی تیاریاں درست سمت میں جاری ہیں ۔ اگلے برس ۲۳؍جولائی سے اولمپکس کا انعقاد ہونا ہے اور اس میں ابھی ایک سال باقی ہے۔گزشتہ سال منعقدہ ایف آئی ایچ سیریز کے فائنلز اور اولمپک کوالیفائرس میں ہندوستانی خواتین اور مردوں کی ٹیموں نے عمدہ کارکردگی کا مظاہرہ کیا۔ اولمپک ہاکی پروگرام کا اعلان کردیا گیا ہے۔منپریت نے کہا کہ پچھلے سال ہماری ٹیم کی کارکردگی کی بنیاد پر میں یہ کہہ سکتا ہوں کہ ہمارے پاس اگلے سال اولمپکس میں میڈل جیتنے کا اچھا موقع ہے۔ ٹیم میں شامل تمام کھلاڑی اپنا کردار جانتے ہیں اور ہمارے پاس بطور ٹیم ترقی کیلئے کافی وقت ہے۔
 انہوں نے کہا کہ ہم اولمپکس میں متوقع نتائج کے حصول کے لئے صحیح سمت میں گامزن ہیں ۔ ہمیں صرف اپنی کارکردگی پر مستقل توجہ دینے کی ضرورت ہے تاکہ ہم توقع کے مطابق نتائج حاصل کرسکیں ۔منپریت نے کہا کہ ہندوستانی ٹیم ہر اولمپکس کے ساتھ بہتر ہو رہی ہے۔ مینز ٹیم کے کپتان نے کہا کہ میں ابھی سے بالکل ٹھیک ایک سال بعد اولمپکس میں شمولیت کا منتظر ہوں جہاں پوری دنیا کے بہترین کھلاڑی موجود ہوں گے۔ میں نے اب تک ۲؍اولمپک کھیلے ہیں اور مجھے کھیل کے اس مہا کمبھ میں کھیلنے کا تجربہ ہے۔ ہاکی ٹیم کے کپتان نے کہا کہ ایک سال باقی ہے اس لئے کھلاڑیوں میں بےچینی رہتی ہے۔۲۰۱۲ء کے لندن اولمپکس میں ٹیم کی ناقص مہم تھی لیکن یہ میرے لئے خاص تھا کیونکہ یہ میرا پہلا اولمپکس تھا۔
  ہاکی کھلاڑی منپریت سنگھ نے کہا کہ ہم پہلے ہی بہتر ٹیم کی حیثیت سے ۲۰۱۶ء کے ریو اولمپکس میں شامل ہوچکے ہیں لیکن وہاں ہمیں توقع کے مطابق نتائج نہیں ملے۔ ہم ٹوکیو اولمپکس میں اس کے حصول کیلئے سخت کوشش کر رہے ہیں ۔ خواتین کی ہاکی ٹیم کی کپتان رانی کو یقین ہے کہ ٹیم اگلے سال اولمپکس میں ملک کو فخر کا مقام فراہم کرے گی۔ انہوں نے کہا کہ ہم نے حالیہ دنوں میں دنیا کی ٹاپ ٹیموں کے خلاف عمدہ کارکردگی کا مظاہرہ کیا ہے اور ہم نے ثابت کیا ہے کہ ہماری ٹیم اولمپکس میں ملک کو میڈل دلانے کی صلاحیت رکھتی ہے۔
 رانی نے کہا کہ ہماری ٹیم میں تجربہ کار کھلاڑیوں کا ایک اچھا مجموعہ ہے جو جونیئر کھلاڑیوں کی رہنمائی کرتی ہیں ۔ ہماری ٹیم ہر ٹورنامنٹ کے ساتھ بہتر ہو رہی ہے اور ہم اس ایک سال میں اپنی کارکردگی میں مزید بہتری لائیں گی۔ریو اولمپکس کا حصہ ہونے کی وجہ سے خواتین ٹیم کی کپتان کا کہنا تھا کہ ریو کا تجربہ انہیں ٹوکیو اولمپکس میں بہتر فیصلے کرنے میں مدد فراہم کرے گا۔ 
 رانی نے کہا کہ ریو اولمپکس کا حصہ بننا خوشی کی بات ہے۔ ہم نے۳۶؍برس بعد اس کے لئے کوالیفائی کرکے تاریخ رقم کی۔ اولمپکس جیسے کھیلوں کے مہا کمبھ میں حصہ لینا ایک بہت اچھا تجربہ تھا۔رانی نے کہا کہ اگرچہ ہمیں بہتر نتائج نہیں مل سکے اس کے باوجود مجھے اولمپک مقابلوں میں حصہ لے کر بہت کچھ سیکھنے کو ملا۔ ریو کے تجربے کی بنیاد پر میں ٹوکیو اولمپکس میں میچ کے دوران فیلڈ کے بارے میں صحیح فیصلہ کر سکوں گی۔