آرسنل نے پریمیر لیگ چمپئن کو شکست دیتے ہوئے اسے ایک سیزن میں سب سے زیادہ پوائنٹس حاصل کرنے سے روک دیا
EPAPER
Updated: July 17, 2020, 12:01 PM IST | Agency | London
آرسنل نے پریمیر لیگ چمپئن کو شکست دیتے ہوئے اسے ایک سیزن میں سب سے زیادہ پوائنٹس حاصل کرنے سے روک دیا
انگلش پریمیر لیگ کا خطاب پہلے ہی لیورپول اپنے نام کر چکی ہے حالانکہ گزشتہ رات کھیلے جانے والے مقابلے میں اسے ہار کا سامنا کرنا پڑا جس کی وجہ سے اس کا مانچسٹر سٹی کا ایک سیزن میں ریکارڈ پوائنٹس حاصل کرنے کا خواب ٹوٹ گیا۔بدھ کی دیر رات کھیلے جانے والے مقابلے میں لیورپول کو آرسنل کے ہاتھوں ایک کے مقابلے ۲؍گول سے شکست کا سامنا کرنا پڑا۔
واضح رہے کہ لیورپول نے ۳۰؍سال کے طویل عرصہ کے بعد پریمیر لیگ کا خطاب اپنے نام کر لیا ہے۔اس کی نگاہیںمانچسٹر سٹی کے ذریعے ایک سیزن میں بنائے گئے ۱۰۰؍پوائنٹس پر لگی ہوئی تھیں اور اس ریکارڈ کو توڑنے کا لیورپول کے پاس موقع بھی تھا لیکن وہ اس میں ناکام ہو گئے۔ سادیو مانے نےکھیل کے ۲۰؍ویں منٹ میں گول کرتے ہوئے لیورپول کو ایک صفر کی برتری دلا دی تھی لیکن آرسنل کے الیکزانڈرے لکاجیٹے نے پہلے ہاف کے ۳۲؍ویں منٹ میں گول کرتے ہوئے آرسنل کو برابری پر لاکر کھڑا کر دیا۔ اس کے ۱۲؍منٹ بعد ہی ریس نیلسن نے آرسنل کےلئےگول کر دیا جو فیصلہ کن ثابت ہوا۔
میچ کے بعد لیورپول کے کوچ یرگون کلوپ نے کہا ’’ ہم سبھی انسان ہی ہیں۔ میںاتنی ڈھیر ساری مثبت باتوں میں سے کوئی منفی بات نہیں تلاش کر سکتا ۔ہم اس سیزن میں کافی پہلے ہی چمپئن بن گئے تھے۔ہمارے کھلاڑیوں نے شاندار کارکردگی کا مظاہرہ کرتے ہوئے خطاب جیتا ہے۔انہوںنے پورے سیزن کے دوران شاندار کارکردگی کا مظاہرہ کیا اور اس کامیابی کو کوئی کم نہیں کرسکتا۔‘‘
واضح رہے کہ لیورپول نے اپنے گزشتہ مقابلوں میں سے صرف ایک پوائنٹ ہی حاصل کیا ہے۔اسے برنلے نے بھی ایک ایک سے برابری پر روک دیا تھا۔آرسنل کے ہاتھوں ملنے والی شکست اس سیزن میں لیورپول کی محض تیسری شکست ہے۔لیورپول کے اب ۹۳؍پوائنٹس ہیں اور بقیہ دونوں میچ جیتنے پر بھی اس کے ۹۹؍پوائنٹس ہی ہوںگے جو کہ مانچسٹری سٹی کے ذریعے بنائے گئے ایک سیزن میں ۱۰۰؍پوائنٹس سے کم ہوں گے اور اس طرح لیورپول کا سٹی کا ریکارڈ توڑنے کا خواب چکنا چور ہوگیا۔