یوروپا لیگ مقابلوں میں مانچسٹر یونائیٹڈنے لاسک لنز کو جبکہ انٹر میلان نے گیٹافے کو شکست دی
EPAPER
Updated: August 07, 2020, 10:14 AM IST | Agency | Berlin
یوروپا لیگ مقابلوں میں مانچسٹر یونائیٹڈنے لاسک لنز کو جبکہ انٹر میلان نے گیٹافے کو شکست دی
مانچسٹر یونائیٹڈ اور انٹر میلان نے اپنے اپنے مقابلے جیت کر یوروپا لیگ کے کواٹر فائنل میں جگہ بنا لی ہے۔ان مقابلوں کے ساتھ ہی کورونا وائرس کی وباء کے بعد خالی اسٹیڈیم میں سہی یہاں فٹبال کی واپسی ہوئی ۔ مانچسٹر یونائیٹڈ نے بدھ کی دیر رات کھیلے جانے والے مقابلے میں لاسک لنز کے خلاف دوسرے لیگ کے میچ میںایک کے مقابلے ۲؍گول سے کامیابی حاصل کی۔ اس جیت کے ساتھ ہی مین یو(مانچسٹر یونائیٹڈ ) نے آسٹریائی ٹیم لنز کے خلاف مجموعی طور پر ایک۔۷؍کی برتری کے ساتھ کوارٹر فائنل میں قدم رکھا۔یاد رہے کہ پہلے لیگ کے مقابلے میں مانچسٹر یونائیٹڈ نے صفر۔۵؍سے کامیابی حاصل کی تھی۔یہ مقابلہ ۵؍ماہ قبل کھیلا گیا تھا۔
گزشتہ دیر رات کھیلے جانے والے مقابلے میں لاسک لنز کےلئے۵۵؍ویں منٹ میںفلپ وسنگر نے گول کرتے ہوئے اپنی ٹیم کو ایک صفر سے آگے کر دیا تھا۔ان کی یہ برتری زیادہ دیر تک قائم نہیں رہ سکی اور ۲؍منٹ بعد ہی مانچسٹر یونائیٹڈ کےلئے جیسی لنگارڈ نے گول کرتے ہوئے اسکور ایک ایک سے برابر کردیا۔کھیل کے ۸۸؍ ویں منٹ میں مین یو کی طرف سے انتھونی مارشل نے گول کرتے ہوئے اسکور ایک۔۲؍کردیا جو آخر تک برقرار رہا۔ویسے بھی پہلے لیگ میں بڑی شکست سے دوچار ہونے والی لاسک لنز پورے میچ کے دوران دباؤ میں نظر آئی۔
دوسرے مقابلے میں انٹر میلان نے رومیلو لوکاکو اور کرسٹین ایرکسن کے گول کی بدولت گیٹافے کے خلاف دو صفر سے کامیابی حاصل کرتے ہوئے یوروپا لیگ کے کوارٹر فائنل میں قدم رکھا۔واضح رہے کہ ان دونوں ٹیموں کے درمیان کوارٹر فائنل میں داخل ہونے کےلئے ایک ہی میچ کھیلا گیا۔ان دونوں نے کورونا کے سبب پہلے لیگ کے مقابلے میں شرکت نہیں کی تھا جس کے بعد یوروپا لیگ کو ملتوی کردیا گیا تھا۔