لیورپول کے صلاح نے دوسری بار ایف ڈبلیو اے کے صحافیوں سے۴۸؍ فیصد ووٹ کے ساتھ باوقارانعام جیتنے میں کامیابی حاصل کی

: فٹبال رائٹرس اسوسی ایشن (ایف ڈبلیو اے) نے جمعہ کو مصرکے فٹبالر محمد صلاح کو۲۰۲۲ء کا فٹبالر آف دی ایئر قرار دیا ہے۔ ۲۰۱۸ء میں اپنی کامیابی کے بعدلیورپول کے نمبر۱۱؍ صلاح نے دوسری بار ایف ڈبلیو اے کے صحافیوں سے ۴۸؍ فیصد ووٹ کے ساتھ باوقارانعام جیتنے میں کامیابی حاصل کی جبکہ کیون ڈی برائن اور ڈیکلان رائس نے بالترتیب دوسرااور تیسرامقام حاصل کیا۔
 صلاح منیجر یورگین کلوپ کی ٹیم کے ان ۹؍ اراکین میں سے ایک ہیں جنہوں نے رائے شماری میں ووٹ حاصل کیا۔ غور طلب ہے کہ صلاح کو ٹرافی ۵؍ مئی کو دی جائے گی۔قابل ذکر ہے کہ مصری فٹبالر نے ایک بارپھر گول کے تناظر میں کرشماتی اعدادوشمار حاصل کئے ہیں۔ صلاح پریمیر لیگ گولڈن بوٹ (۲۲؍گول) اور پلے میکر آف دی سیزن (۱۳؍ اسسٹ) دونوں ایوارڈس کیلئے سب سے آگے ہیں۔ صلاح نے اس دوران تمام مقابلوں کے۴۴؍ میچوں میں حصہ لیا اور۳۰؍ گول کئے  اور۱۴؍گول کرنے میں معاونت بھی کی۔ صلاح کینی ڈالگلش اور جان بارنس کے بعد لیورپول کے صرف تیسرے کھلاڑی ہیں جنہوں نے ایف ڈبلیو ایوارڈ جیتا ہے۔ اس وقت لیورپول کی ٹیم محمد صلاح اور سادیو مانے کی بدولت اچھا کھیل رہی ہے اور اس کے ایک سیزن میں ۴؍خطاب جیتنے کا سنہرا موقع ہے ۔ لیگ کپ اس نے جیت لیاہے، ایف اے کپ کے فائنل میں ہے اور چمپئن لیگ کے سیمی فائنل میں ہے۔