اسپنر ڈیانا ڈوٹی کوپہلی بار شامل کیا گیا جبکہ آل راؤنڈر جیس واٹکن کی واپسی

نیوزی لینڈ کرکٹ نے ۱۷؍ رکنی خاتون کرکٹ ٹیم کا اعلان کیا ہے جو آئندہ ماہ محدود اوورس کی سیریز کے لئے آسٹریلیاکا سفر کرے گی۔نیوزی لینڈ کرکٹ (این زیڈ سی) نے  آسٹریلیائی دورے کیلئے۱۷؍ رکنی خواتین ٹیم کا اعلان کیا جبکہ اس ٹیم میں پہلی بار ان کیپڈ لیگ اسپنر ڈیانا ڈوٹی کو شامل کیا گیا ہے جبکہ آل راؤنڈر جیس واٹکن ۲۰۱۸ءکے بعد ٹیم میں واپس آئی ہیں۔
 کیوی ٹیم کا یہ دورہ۲۶؍ستمبر سے شروع ہوگا جس میں وہ آسٹریلیا کے خلاف برسبین میں ۳؍ ٹی ۲۰؍ اور۳؍ ون ڈے میچ کھیلے گی۔نیوزی لینڈ کی خاتون کپتان سوفی ڈیوائن نے ان تمام لوگوں کا شکریہ ادا کیا ہے جنہوں نے اس دورے کو ممکن بنایا ہے۔ این زیڈ سی کی سرکاری ویب سائٹ نے ڈیوائن کے حوالے سے بتایا ہے کہ ٹیم اس دورے کو حقیقت بنانے والے ہر شخص کی بہت شکرگزار ہے۔ ہمیں امید ہے کہ آئندہ ون ڈے اور ٹی ۲۰؍ میچ اس مشکل وقت میں لوگوں کی تفریح ​​کرسکیں گے۔
 سوفی نے کہا کہ ہم یقینی طور پر روز باؤل ٹرافی واپس لانے کے لئے وہاں جارہے ہیں۔ ٹیم کسی بھی خام خیالی میں نہیں ہے۔ ورلڈ کلاس آسٹریلیائی ٹیم کے خلاف یہ سخت ٹور ہونے والا ہے۔ ہم ایک تجربہ کار ٹیم ہیں اور ایمی کی واپسی نے میدان میں ہماری بیٹنگ کی گہرائی اور قیادت میں اضافہ کیا ہے۔
 ڈیوائن نے کہا کہ ٹیم نے سردیوں کے کیمپ میں اچھی طرح سے تیاری کی تھی اور وہ آسٹریلیا کواس کے میدانوں میں گھیرنے کی تیاری کر رہی ہے۔ ٹیم کے ہیڈ کوچ باب کارٹر نے کہا کہ ہم ڈیانا اور جیس کو ٹیم میں خوش آمدید کہتے ہیں اور ہم آنے والے دورے پر ان کے ساتھ مل کر کام کرنے کے منتظر ہیں۔
 نیوزی لینڈ کی ٹیم اس طرح ہے:سوفی ڈیوائن (کپتان) ، سوزی بیٹس ، نالی ڈوڈ ، ڈیانا ڈوٹی ، لارین ڈاونس ، میڈی گرین ، ہولی ہڈلسٹن ، ہیلے جینسن ، امیلیا کیر ، جیس کیر ، روزریری مائر ، کیٹی مارٹن ، کیٹی پرکنز ، ہنا رو ، ایمی سیٹرتھویٹ ، لی تاہو ، جیس واٹکن۔