ٹیم انڈیا نے مہمان ٹیم کے خلاف ۱۸۵؍رن بنائے

 یہاں نریندر مودی کرکٹ اسٹیڈیم میں کھیلے جانے والے ٹی۔۲۰؍ سیریز کے چوتھے اور اہم مقابلے میں ہندوستانی ٹیم نے پہلے بلے بازی کرتے ہوئے مقررہ ۲۰؍ اووروں میں۸؍وکٹوں کے نقصان پر ۱۸۵؍رن بنا لئے۔ٹیم انڈیا کےلئے سوریہ کمار یادو نے جارحانہ بلے بازی کامظاہرہ کرتے ہوئے ہاف سنچری بنائی۔سوریہ کمار نے ۳۱؍گیندوں کا سامنا کرتے ہوئے۶؍چوکوں اور ۳؍چھکوں کی مدد سے شاندار ۵۷؍رنوں کی اننگز کھیلی۔ گزشتہ ۳؍میچوں میں ناکام رہنے والے کے ایل راہل اس میچ میں بھی ناکام رہے اور ۲؍ چوکوں کی مدد سے ۱۴؍رن بناکر آؤٹ ہو گئے۔ افتتاحی بلے باز روہت شرما بھی صرف ۱۲؍رنوں کا  اضافہ کرسکے۔کپتان وراٹ کوہلی بھی صرف ایک رن بناکر پویلین لوٹ گئے۔اس کے بعد سوریہ کمار نے اننگز کو کچھ حد تک سنبھالا اور ٹیم کو باعزت اسکور تک پہنچانے میں اہم رول ادا کیا۔شریس ایر(۳۷)اور رشبھ پنت(۳۰) نے بھی اچھا تعاون پیش کیا۔