آج نیوزی لینڈ اور ہندوستان کے درمیان تیسرا ٹی ۲۰؍ میچ ہملٹن میں کھیلا جائے گا۔ مہمان ٹیم صفر۔۳؍ کی ناقابل تسخیر برتری حاصل کرنے کیلئے بیقرار۔

 هملٹن : وراٹ کوہلی کی ٹیم انڈیا میزبان نیوزی لینڈ کے خلاف بدھ کو ہونے والے تیسرے ٹی۲۰؍میچ میں تاریخ  رقم کرنے کے مقصد کے ساتھ اترے گی۔ اگر ہندوستانی ٹیم تیسرا میچ جیتتی ہے تو یہ پہلی بار ہوگا جب ٹیم انڈیا نیوزی لینڈ کی زمین پر ٹی ۲۰؍ سیریز جیتے گی۔ہندوستان نے پہلے ۲؍میچ آسانی سے جیت کر ۵؍ میچوں کی سیریز میں  صفر۔۲؍ کی برتری حاصل کرلی ہے جبکہ میزبان ٹیم اپنے میدان میں کھیلنے کے باوجود کھیل کے ہر شعبہ میں اکھڑی نظر آ رہی ہے۔ نیوزی لینڈ نے پہلے میچ میں۲۰۳؍رن  کا اسکور بنایا لیکن اس کے بولر اس کا دفاع نہیں کر پائے جبكہ دوسرے میچ میں اس کا اسکور اتنا چھوٹا تھا کہ اس کے گیند بازوں کے پاس دفاع کرنے کیلئے کچھ نہیں بچا تھا۔
 موجودہ فارم کے مطابق دیکھا جائے تو ہندوستانی ٹیم ۵؍مسلسل ٹی ۲۰؍ میچ جیت چکی ہے اور اس سیریز میں ۳؍ میچ باقی رہتے اس کے پاس نیوزی لینڈ میں پہلی بار ٹی ۲۰؍ سیریز جیتنے کا شاندار موقع ہے۔ ہندوستانی ٹیم اس سے پہلے۲؍ مواقع پر کیوی سرزمین پر ٹی ۲۰؍ سیریز نہیں جیت پائی ہے۔ یہ ٹی ۲۰؍ ورلڈ کپ کا سال ہے اور ۵؍میچوں کی سیریز میں دونوں ٹیموں کے پاس مختلف کومبی نیشن بنانے کی کوشش کرنے کا موقع رہے گا۔  موجودہ کیوی ٹیم کے پاس اس کے پہلے پسنديدہ کھلاڑی نہیں ہیں لیکن آکلینڈ میں کھیلے جانے والے پہلے ۲؍ میچوں میں اس کے کھلاڑیوں نے موقع کا فائدہ نہیں اٹھایا۔
 نیوزی لینڈ نے اپنے گزشتہ ۵؍ میچوں میں ۴؍ میچ گنوائے ہیں جبکہ ہندوستان نے اپنے پچھلے پانچوں میچ  جیتے ہیں۔ میزبان ٹیم کے چوتھے نمبر کے بلے باز کولن ڈی گرینڈهوم ابھی تک  ناکام  ثابت ہوئے ہیں اور۲؍ میچوں میں صفر اور۳؍ رن ہی بنا پائے ہیں۔ گرینڈهوم کا گیندبازی  میں استعمال نہیں ہوا ہے اور میزبان ٹیم چاہے گی کہ گرینڈهوم بلے بازی میں بھی  اپنا جلوہ دکھائیں۔ ہندوستانی بلے بازی میں اوپنر روہت شرما دونوں میچوں میں جلدہی آؤٹ ہوئے ہیں جبکہ گھریلو سیزن میں انہوں نے بہت شاندار کارکردگی کا مظاہرہ کیا تھا۔ ہندوستان کی دونوں جیت میں روہت کا فارم واحد تشویش کی بات ہے۔ ۲؍ مقابلوں میں وہ جلد ہی پویلین لوٹ گئے تھے۔ 
 نیوزی لینڈ کے پاس بینچ پر متبادل کے طور تیز گیند بازی آل راؤنڈر ڈیرل مشیل اورا سکاٹ كگلجن ہیں اور ابھی تک کے اشارے کے مطابق كگلجن کو الیون میں اترنے کا موقع مل سکتا ہے۔ اگر ٹیم میں مشیل کو موقع ملتا ہے تو گرینڈهوم یا اسپنرس میں سے کسی ایک کو باہر بیٹھنا ہوگا۔ہندوستانی ٹیم اس میچ میں بھی اسی الیون کے ساتھ اترنا  چاہے گی جس نے پہلے ۲؍ میچ آسانی سے جیتے ہیں۔ اگر کوئی تبدیلی ہوتی ہے تو شاردل ٹھاکر کی جگہ ٹیم مینجمنٹ نوديپ سینی کی رفتار کو ترجیح دے سکتا ہے۔تیسرے میچ کیلئے هملٹن  کے سیڈن پارک کی پچ بڑے اسکور والی پچ ہے۔ یہاں گزشتہ ۵؍ میچوں میں ۳؍ مواقع پرپہلے بلے بازی کرنے والی ٹیم نے۱۹۰؍ رن سے زیادہ کے اسکور بنائے ہیں۔ یہاں کھیلے جانے والے آخری ٹی  ۲۰؍میں نیوزی لینڈ نے۲۱۲؍ رن بنائے اور ہندوستان کو صرف ۴؍ رن سے شکست دے دی تھی۔  اس میدان پر پہلے بلےبازي کرنے والی ٹیم نے گزشتہ ۴؍ میچ جیتے ہیں۔
 ممکنہ ٹیمیں: نیوزی لینڈ: مارٹن گپٹل، کولن منرو، کین ولیمسن (کپتان)، کولن ڈی گرینڈ ہوم، راس ٹیلر، ٹم سيفرٹ (وکٹ کیپر)، مشیل سینٹنر / ڈیرل مشیل، ایش سوڈھی، ٹم ساؤدی، بلیئر ٹكنر / اسکاٹ كگلجن، امش بینیٹ۔ہندوستان : روہت شرما، لوکیش راہل (وکٹ کیپر)، وراٹ کوہلی (کپتان)، شريس ایّر، منیش پانڈے، شیوم دوبے، رویندر جڈیجا، شاردل ٹھاکر / نوديپ سینی، یزویندر چہل، محمد سمیع، جسپريت بمراه۔