کبھی ٹاپ پوزیشن پر قابض رہنے والی رائلز لیگ میں جدوجہد کرنے پر مجبور۔ پنجاب کنگز کی بلے بازی میں تسلسل کا فقدان ہے

 راجستھان رائلز سنیچر کو یہاں انڈین پریمیر لیگ (آئی پی ایل) کے اپنے میچ میں پنجاب کنگز کے خلاف کامیابی کی راہ  پرلوٹنے  کے لئے اپنی بلے بازی کی پریشانیوں پر قابو پانے کی کوشش کرے گا۔رائلز کی ٹیم کبھی گجرات ٹائٹنس کو ٹاپ پوزیشن کے لئے سخت چیلنج  پیش کر رہی تھی لیکن حال ہی میں اس کی کارکردگی نے اسے ٹیبل پرپچھاڑ دیا ہے۔ کولکاتا نائٹ رائیڈرس اور ممبئی انڈینس سے ہارنے کے بعد اب اس کا مقابلہ پنجاب سے ہوگا۔ دوسری طرف پنجاب کنگز نے پوائنٹس ٹیبل پر ٹاپر گجرات پر۸؍ وکٹوں سے کامیابی حاصل کر لی ہے۔ مینک اگروال کی زیرقیادت ٹیم اپنی پلے آف کی امیدوں کو زندہ رکھنے کےلئے اپنی جیت کی مہم جاری رکھنا چاہے گی۔راجستھان اس وقت پوائنٹس ٹیبل پر تیسرے نمبر پر ہے اور اس کا اہم کریڈٹ جوس بٹلر کو جاتا ہے، جنہوں نے موجودہ ٹورنامنٹ میں اب تک سب سے زیادہ۵۸۸؍ رن بنائے ہیں۔ ممبئی کے خلاف انہوں نے اکیلے ہی ذمہ داری سنبھالی جبکہ کولکاتا کے خلاف وہ ناکام رہے۔ راجستھان نے یہ دونوں میچ ہارے تھے۔ دو دیگر ٹاپ آرڈر بلے باز، دیو دت پڈیکل اور کپتان سنجو سیمسن قسطوں میں اچھی کارکردگی پیش کرنے  میں کامیاب رہے ہیں۔ ان دونوں کو مزید ذمہ داری قبول کرنے کی ضرورت ہے۔ ٹیم چوتھے نمبر پر مختلف کھلاڑیوں کو آزما رہی ہے اور اگر شیمرون ہتمائر کو اس پوزیشن پر میدان میں اتارا جاتا ہے تو اس کے ٹاپ ۴؍ بلے باز کسی بھی گیندبازی حملہ کو تہس نہس کر سکتے ہیں۔ راجستھان رائلز کی ٹیم کو پہلے بلے بازی کی پوزیشن میں بڑا اسکور کرنے کی ضرورت ہے کیونکہ اسے ۴؍ میں سے ۳؍ نقصان اٹھانا پڑا ہےجب اس نے پہلے بلے بازی کرتے ہوئے بڑا اسکور نہیں بنایاتھا۔راجستھان رائلز کی ٹیم کا گیندبازی حملہ مضبوط ہے لیکن اس کے گیند باز گزشتہ ۲؍ میچوں میں۱۵۸؍ اور۱۵۲؍رن کے اسکور کا دفاع کرنے میں ناکام رہے ہیں۔ یہ یقینی طور پر کم اسکور تھا کیونکہ یزویندر چہل، روی چندرن اشون، ٹرینٹ بولٹ، کلدیپ سین اور پرسدھ کرشنا، جو اس وقت ٹورنامنٹ میں سب سے زیادہ وکٹ لینے والے بولر ہیں، نے متاثر کن بولنگ کی تھی۔پنجاب کے بلے بازوں کیلئے رائلز کی بولنگ کا سامنا کرنا آسان نہیں ہوگا۔ پنجاب کنگز کی ٹیم کی بلےبازی میں تسلسل کا فقدان ہے۔ شکھر دھون اس وقت ٹیم کے سب سے کامیاب بلے باز ہیں۔ لیام لیونگ اسٹون اور بھانوکا راجا پکسے نے بھی درمیان میں اچھی بلے بازی کی ہے لیکن انہیں ایک ساتھ اچھی بلے بازی کرنی ہوگی۔ جونی بیریسٹو اپنی شہرت کے مطابق دھماکہ خیز بیٹنگ نہیں کر سکے جبکہ اگروال کا بلہ بھی کام نہیں کر رہا ہےجو ٹیم کیلئے تشویشناک ہے۔گزشتہ میچ میں پنجاب کے گیند بازوں نے عمدہ کارکردگی کا مظاہرہ کرتے ہوئے گجرات کو۱۵۰؍ سے کم رن تک محدود رکھا۔ کگیسو ربادا آخری ۲؍ میچوں میں ۴۔۴؍ وکٹ لے کر فارم میں واپس آئے۔ ارشدیپ سنگھ نے پنجاب کے لئے بہت اچھی گیند بازی کی ہے۔ انہوں نے زیادہ وکٹ نہیں لئے ہیں لیکن کفایتی بولنگ کی ہے۔