ہندوستانی پہلوان نے انڈر ۲۳؍ورلڈ چمپئن شپ کے فائنل میں عبدالمالک کاراچوف کو شکست دی۔

ہندوستانی پہلوان چراغ چکارا نے انڈر۲۳؍ ورلڈ چمپئن شپ ریسلنگ میں مردوں کے ۵۷؍ کلوگرام زمرے کے فائنل میں کیرغزستان کے عبدالمالک کاراچوف کو شکست دے کر طلائی تمغہ جیت لیا۔ 
ہندوستان نے اس چمپئن شپ میں ایک طلائی، ایک چاندی اور ۷؍ کانسہ سمیت کل ۹؍ تمغے جیتے ہیں۔ البانیہ کے شہر تیرانہ میں اتوار کو کھیلے گئے میچ میں چکارا نے قریبی مقابلے میں کاراچوف کو۳۔ ۴؍ سے شکست دے کر طلائی تمغہ جیتا۔ اس جیت کے ساتھ وہ انڈر۲۳؍ ورلڈ چمپئن بننے والے صرف دوسرے ہندوستانی مرد پہلوان بن گئے ہیں۔ وہ امن سہراوت اور رتیکا ہڈا کے کلب میں شامل ہوگئے۔ 
چراغ چکارا نے اس سے قبل سیمی فائنل میں قزاخستان کے ایلن اورل بیک کو شکست دے کر ٹائٹل میچ میں جگہ بنائی تھی۔ سیمی فائنل میں انہوں نے مخالف پہلوان پر۰۔ ۸؍ کی زبردست کامیابی حاصل کی تھی۔ انہوں نے پہلے راؤنڈ میں جاپان کے گاٹوکو اوزاوا کو ۱۔ ۶؍سے ہرایاتھا اور پھر کوارٹر فائنل میں یونس ایوباتیروف کو۲۔ ۱۲؍ سے شکست دی۔ اس وزن کے زمرے میں ایوبتیروف نے کانسے کا تمغہ جیتا۔ ایک اور میچ میں سوجیت کلکل نے مردوں کے ۷۰؍ کلوگرام زمرے میں کانسے کا تمغہ جیت کر ہندوستان کے تمغوں کی تعداد میں اضافہ کیا۔ انہوں نے تاجکستان کے مصطفی احمدوف کو ۴۔ ۱۳؍ سے شکست دے کر تیسری پوزیشن حاصل کی۔ وکی نے مردوں کے۹۷؍ کلوگرام فری اسٹائل مقابلے میں یوکرین کے یورپی جونیئر چمپئن ایوان پریماچینکو کو ۲۔ ۷؍ سے شکست دے کر کانسے کا تمغہ جیتا۔ وکی نے پہلے راؤنڈ میں جارجیا کے میرب سلیمانیشویلی اور کوارٹر فائنل میں مالدووا کے راڈو لیفٹر کو ہرایاتھا لیکن سیمی فائنل میں وہ ایران کے مہدی ہزیلویان مورفا سے ہار گئے۔