ایشیا کپ کے سیمی فائنل میں آج ہندوستان کا تھائی لینڈ سے مقابلہ۔ ہرمن پریت کور کی ٹیم کمزور حریف کو روندنے کیلئے تیار

 ویمنز ایشیا کپ میں ہندوستان کا اب تک کا سفر ہموار رہا ہے اور توقع ہے کہ ٹیم جمعرات کو یہاں سیمی فائنل میں کمزور تھائی لینڈ کی ٹیم سے مقابلہ کرے گی تو وہ ایک اور زبردست کامیابی حاصل کرے گی۔ ان دونوں ٹیموں کے درمیان آخری میچ انتہائی یکطرفہ رہا جس میں ہندوستان نےتھائی لینڈ کو۱۵ء۱؍ اوور میں صرف ۳۷؍ رن پر ڈھیر کر دیا اور پھر اس لیگ مرحلے کے میچ میں آسان فتح درج کروائی۔ تھائی لینڈ کی ٹیم ہندوستان کے خلاف گزشتہ میچ سے بہتر بلے بازی  کرنا چاہے گی۔ ٹیم نے میزبان اور دفاعی چمپئن بنگلہ دیش کو شکست دے کر پہلی بار ایشیا کپ کے سیمی فائنل میں جگہ بنائی ہے۔ نارومول چائی وائی کی ٹیم یہ ثابت کرنے کی امید کرے گی کہ ٹورنامنٹ کیلئے کوالیفائی کرنا کوئی غلط بات نہیں ہے۔ ہندوستان کو اس ٹورنامنٹ کے ذریعہ اپنی بینچ کی طاقت کو جانچنے کا ایک بہترین موقع ملا ہے اور ٹیم کے کم تجربہ کار کھلاڑیوں کو جنوبی افریقہ میں اگلے سال ہونے والےٹی ۲۰؍ ورلڈ کپ سے قبل کافی میچ کھیلنے کا وقت ملا ہے۔ اس حکمت عملی کے تحت، ہندوستانی کپتان ہرمن پریت کور نے ۶؍ میں سے صرف ۳؍ لیگ میچ کھیلے اور پاکستان کے خلاف ہندوستان کی واحد شکست کے دوران ۷؍ویں نمبرپر بیٹنگ کرنے آئیں۔ فنشر کا کردار ادا کرنے کیلئے کسی کھلاڑی کی تلاش میں ہندوستان نے جارحانہ بلے باز کرن پربھو نوگیرے اور ڈیلن ہیملتا کو آزمایا۔ کرن، جنہوں نے مئی میں خواتین کےٹی ۲۰؍ چیلنج میں تیز ترین نصف سنچری اسکور کی تھی، ۳؍ اننگز میں صرف۱۰؍ رن ہی بنا سکی جبکہ زیادہ تجربہ کار ہیملتا کے پاس بھی اپنی ۴؍ اننگز میں۴۵؍ رن ہیں۔ اب دیکھنا یہ ہے کہ آیا ہندوستان تجربات جاری رکھتا ہے یا فائنل کی تیاری کیلئے اپنی مضبوط ترین ٹیم کو میدان پر اتارتا ہے۔ دپتی شرما، اسنیہہ رانا اور راجیشوری گائیکواڑ کی اسپن تینوں ٹیم پورے ٹورنامنٹ میں مخالف بلے بازوں کو روکنے میں کامیاب رہی۔ تھائی لینڈکی ٹیم ہندوستان کو چیلنج کرنے کیلئے اپنے۳؍ ٹاپ کھلاڑیوں ناناپٹ کونچاروئنکی، ناتھاکن چنتھم اور کپتان چائی وائی پر انحصار کرے گی۔ تینوں نے ٹورنامنٹ میں ٹیم کیلئے  کافی رن بنائے ہیں لیکن ہندوستان کی نظم و ضبط والی گیندبازی کے سامنے ان کا راستہ آسان نہیں ہوگا۔ ہندوستان کیلئے سب سے مثبت پہلو جمائمہ روڈریگیز فارم میں ہے۔ جمائمہ نے مڈل آرڈر میں ذمہ داری نبھاتے ہوئے دو نصف سنچریوں کی مدد سے سب سے زیادہ۱۸۸؍ رن بنائے۔ پہلے ۲؍ میچوں میں ناکام رہنے والی اوپنر شیفالی ورما نے بھی زبردست واپسی کی ہے۔ دوسرا سیمی فائنل بھی جمعرات کو ہی پاکستان اور سری لنکا کے درمیان کھیلا جائے گا۔ ٹیم انڈیا کی کپتان ہرمن پریت کور نے میچ سے قبل کہاکہ ہم پوری طرح تیارہیں اور ہماری کوشش تھائی لینڈ کو بڑے فرق سے شکست دے  کر اپنے اعتماد میں اضافہ کرنا ہے۔ ہماری طرف سے یہی کوشش رہے گی کہ حریف ٹیم کو کمتر نہ سمجھتے ہوئے اسے زبردست شکست دی جائے ۔ انہوں نے کہاکہ اس وقت ہماری سبھی بلے باز اور گیندباز اچھے فارم میں ہیں اور وہ تسلسل کے ساتھ اپنی کارکردگی جاری رکھے ہوئے ہیں۔ ہم تھائی لینڈ سے مقابلے کیلئے تیار ہیں۔  دوسری طرف پاکستان کی ٹیم فارم میں ہے اور اس نے بھی سری لنکا کو لیگ راؤنڈ میں شکست سے دوچار کردیا تھا۔ پاکستان کی خواتین ٹیم نے پوائنٹ ٹیبل میں دوسری پوزیشن پرلیگ راؤنڈ کا خاتمہ کیا تھا۔ سری لنکا کی خواتین ٹیم بھی کوشش کرے گی وہ ایشیا کپ کے فائنل میں جگہ بناکر معاشی بدحالی کے دور سے گزرنے والے اپنے ملک کے کرکٹ شائقین کو خوشی کا موقع فراہم کرے ۔ اس کے کھلاڑی اچھا کھیلنا چاہیں گی۔ ٹیمیں درج ذیل ہیں:ہندوستان: ہرمن پریت کور (کپتان)، اسمرتی مندھانا، دپتی شرما، شیفالی ورما، جمائمہ روڈریگیز، ایس میگھنا، رچا گھوش، اسنیہہ رانا، ڈیلن ہیملتا، میگھنا سنگھ، رینوکا ٹھاکر، پوجا وستراکر، راجیشوری گائیکواڑ، رادھا نوگی اور کرن یادو۔ تھائی لینڈ: نارومول چائی وائی (کپتان)، نتایا بوچتھم، ناتھاکن چنتھم، سنیڈا چترونگرتانا، اونیچا کامچومپو، سووانن کھیاوٹو، ناناپٹ کونچاروینکی، سلی پورن لاؤمی، بنتھیڈا لیفتھانہ، فننیتا مایا، نانتھیتا تھنپاتھی پپتھونا، سوکتھونپتھون، سوکتھونپتھونا، کونچاروینکی۔