دنیا کے ۵؍ آئی سو لیٹیڈ علاقے: پہلی قسط

Updated: May 01, 2020, 7:42 PM IST | Taleemi Inquilab Desk | Mumbai

For Representation Purpose Only. Photo INN

علامتی تصویر۔ تصویر: آئی این این

گزشتہ چند دنوںسے خبروں میں کچھ الفاظ مسلسل استعمال ہورہے ہیں، جیسے کورنٹین، لاک ڈاؤن اور آئی سو لیشن وغیرہ۔ تعلیمی انقلاب کے کالم ’’اس ہفتے کی اصطلاح‘‘ میں آپ کو کورنٹین اور لاک ڈاؤن کے بارے میں بتایا جاچکا ہے۔ تاہم، آج ہم آپ کو ’’آئی سولیشن‘‘ اور دنیا کے ’’آئی سو لیٹڈ‘‘ مقامات کے بارے میں بتائیں گے۔آئی سولیشن کا لغوی معنی ہے تنہائی، علاحدگی، الگ تھلگ کردینا۔ واضح رہے کہ گلوبلائزیشن کے بعد ایسا ممکن نہیں رہا ہے کہ کوئی بھی ملک آئی سولیٹڈ رہے۔ اس کے باوجود دنیا میں ایسے کئی مقامات ہیں جو کسی نہ کسی وجہ سے یا کچھ حد تک آج بھی آئی سولیٹڈ یعنی علاحدہ اور الگ تھلگ ہیں۔
ترسٹان دا کونیا
ترسٹان دا کونیا، دُنیا کا دور دراز ترین گاؤں ہے جو، سینٹ ہیلنا سے ۱۲۴۳؍ کلومیٹر دور، آتش فشاں پہاڑوں کے ساتھ واقع ہے۔ اس گاؤں سے قریب ترین براعظم جنوبی افریقہ ہے جس کا فاصلہ ۱۴۹۱؍ کلومیٹر ہے۔ یہاں صرف کشتی سے پہنچا جاسکتا ہے جس کیلئے جنوبی افریقہ سے ۶؍ دن تک مسلسل سفر کرنا پڑتا ہے۔یہاں کی آبادی ۲۴۶؍ افراد نفوس پر مشتمل ہے۔کہتے ہیں کہ یہ جزیرہ پرتگالی مہم جو ترسٹان دا کونیا نے ۱۵۰۶ء میں دریافت کیا تھا۔ یہ علاقہ برطانیہ کے زیر انتظام ہے۔ کسی ایمرجنسی کی صورت میں اس علاقے کے لوگوں کو مدد کیلئے کئی دنوں تک انتظار کرنا پڑتا ہے۔ ۲۰۱۶ء میں یہاں کا بجلی کا انتظام خراب ہوگیا تھا جس کے سبب یہاں کے لوگوں کو کئی دن اندھیرے میں گزارنے پڑے تھے۔
اویمیاکون
اویمیاکون روس کا ایک گاؤں اور دنیا کا سرد ترین علاقہ ہے جہاں موسم سرما میں درجۂ حرارت منفی ۷۰؍ ڈگری سینٹی گریڈ تک اور گرما میں منفی ۵۰؍ ڈگری سینٹی گریڈ تک ہوتا ہے۔یہاں کی آبادی ۴۶۲؍ نفوس پر مشتمل ہے۔ یہاں کے درجہ حرارت کی وجہ سے لوگ اس گاؤں کا رخ نہیں کرتے جبکہ یہاں کے باشندے آہستہ آہستہ یہ علاقہ چھوڑ رہے ہیں۔ دوسری عالمی جنگ کے دوران یہاں کی آبادی ۲۵۰۰؍ نفوس پر مشتمل تھی مگر اس میں مسلسل کمی آتی جارہی ہے۔ ماہرین کا کہنا ہے کہ آئندہ چند برسوں میں یہ علاقہ مکمل طور پر خالی ہوجائے گا۔
ٹنڈرا
ٹنڈرا ، یورپ، ایشیاء اور شمالی امریکہ میں واقع قطب شمالی کے علاقوں کے وسیع و عریض رقبے والا وہ خطہ ہے جو ہر طرح کی گھاس پھوس اور پیڑ پودوں سے محروم ہے۔ یہ اس قدر سرد علاقہ ہے کہ یہاں کی نچلی سطح سخت گرمی میں بھی بالکل جمی رہتی ہے۔ یہ خطہ قطب شمالی اور براعظم انٹارکٹکا میں واقع ہے۔ ٹنڈرا میں موسم گرما صرف ۶؍ تا ۱۰؍ ہفتوں پر مشتمل ہوتا ہے۔ یہاں چند جانور بھی پائے جاتے ہیں جن میں لیمنگس، مختلف اقسام کے خرگوش،امریکی رینڈیئر اور قطبی یا برفانی ریچھ قابل ذکر ہیں۔ برسوں پہلےان علاقوں میں انسان بھی آباد تھے لیکن جوں جوں ترقی ہوتی گئی انہوں نے یہ خطہ چھوڑ دیا اور ایسے علاقوں میں رہائش اختیار کرلی جہاں انہیں بنیادی ضرورتیں پوری کرنے کیلئےزیادہ جدوجہد نہیں کرنی پڑتی۔ تاہم، ماہرین کا کہنا ہے کہ گرین لینڈ، الاسکا اور سائبیریا کے ٹنڈرا خطوں میں آج بھی چند قبیلے آباد ہیں جو اپنے علاقوں میں انسانوں کی آمدورفت پسند نہیں کرتے۔ یہ بالکل الگ تھلگ رہتے ہیں۔
بیرو
بیرو، امریکی ریاست الاسکا میں واقع ایک قصبہ ہے جس کا رقبہ ۵۵ء۲؍ کلومیٹر ہے۔ یہاں کی مجموعی آبادی ۴؍ ہزار ۲۱۲؍ افراد پر مشتمل ہے اور یہ سطح سمندر سے ۳؍ میٹر بلندی پر واقع ہے۔ اس علاقے میں پہنچنے کیلئے کوئی سڑک نہیں ہے۔ یہاں صرف ہوائی جہاز کے ذریعے ہی پہنچا جاسکتا ہے۔ اس علاقے میں موسم سرما ۶۵؍ دنوں کا ہوتا ہے۔ سرما میں یہاں ۲۴؍ گھنٹے گہرا اندھیرا چھایا رہتا ہے، یعنی ۶۵؍ دن تک رات ہوتی ہے۔ سیاح یہاں کا رخ کم ہی کرتے ہیں جبکہ یہاں کے افراد آہستہ آہستہ یہ علاقہ چھوڑ کر دیگر شہروں میں منتقل ہورہے ہیں۔
کیپ یارک پینینسولا
آسٹریلیا کے زیر انتظام یہ علاقہ جزیرہ نما یعنی ۳؍ جانب سے پانی سے گھرا ہوا ہے۔ ماہرین کہتے ہیں کہ یہ سب سے بڑا ایسا جزیرہ نما ہے جہاں قدرتی اشیاء سے چھیڑ چھاڑ نہیں کی گئی ہے۔ ۱۶۰۶ء میں جب یہ علاقہ دریافت ہوا تھا تو وہاں انسانوں کی آبادی بہت کم تھی۔ آج یہاں چند قبائل آباد ہیں مگر اس کا نصف سے زائد حصہ مویشیوں کے چرنے کیلئے مختص ہے اور انسانوں کی آمدورفت یہاں بہت کم ہوتی ہے۔ کیپ یارک پینینسولا میں اکثر بارش ہوتی رہتی ہے جس کی وجہ سے یہاں گھنا جنگل ہے۔

دنیا کے ۵؍ آئی سو لیٹیڈ علاقے: پہلی قسط

متعلقہ خبریں