حکم نامے پر وزیر داخلہ کے جعلی دستخط بھی تھے، ریاستی وزارت داخلہ میں کھلبلی، فوری طور پرگائیڈ لائن جاری

ریاست میں مجرموں اور جعلسازوں کے حوصلے ان دنوں بلندہیں۔ اس کا ثبوت گزشتہ دنوں  وزارت داخلہ کے ساتھ کی گئی جعلسازی کے ایک واقعہ سے  ہوتی ہے ۔ اطلاع کے مطابق چندر نا معلوم جعلسازوں نےکسی اور کے نہیں خود وزیر داخلہ دیویندر فرنویس کے نام سے جعلی ای میل آئی ڈی، جعلی لیٹر پیڈ بنائی اور جعلی دستخط کا استعمال کرتے ہوئے کئی سرکاری افسران کے تبادلے کا حکم نامہ جاری کر دیا۔ یہ معاملہ انتہائی سنگین ہے۔  اس کے بعد وزارت داخلہ  نیند سے بیدار ہوا اور اس نے فوری طور پر ایک سرکیولیشن جاری کرکے سرکاری افسران کیلئے ایک گائیڈلائن جاری کی ہے۔ 
  اے بی پی ماجھا کی ایک رپورٹ کے  مطابق گزشتہ دنوں محکمہ داخلہ کے  ہوش اڑ گئے جب اسے معلوم ہوا کہ خود نائب وزیر اعلیٰ اور وزیر داخلہ دیویندر فرنویس کے نام سے کسی نے ای میل آئی ڈی بنایا۔ ان کا جعلی لیٹر پیڈ تیار کیا اس کے بعد اس کے ذریعے اس پر بجلی محکمے کے ۶؍ انجینئروں کے تبادلے کا حکم جاری کیا۔  یہ ای میل  بجلی محکمے کو موصول ہوا ۔اس پر دیویندر فرنویس کے دستخط بھی تھے۔  جب یہ معلوم ہوا کہ دیویندر فرنویس کی جانب سے ایسا کوئی حکم نامہ جاری ہی نہیں کیا تو نہ صرف بجلی محکمے کے بلکہ وزارت داخلہ کے بھی ہاتھوں کے طوطے اڑ گئے۔ آنا ً فاناً میں وزارت داخلہ نے ایک سرکیولر جاری کیا جس میں ہدایت دی گئی ہے کہ کوئی بھی سرکاری افسر آئندہ کسی سرکاری کام کیلئے سرکاری  ای میل آئی ڈی کے علاوہ کوئی اور ای میل استعمال نہ کرے۔ نجی کمپنیوں کے ای میل جیسے جی میل اور یاہو وغیرہ کو کالعدم قرار دیا جائے گا۔ ان کے ذریعے بھیجے گئے ای میل کو سرکاری تسلیم نہیں کیا جائے گا۔  سرکیولر کے مطابق این آئی سی ( نیشنل انفارمیٹکس سینٹر کے ذریعے جاری کر دہ  سرکاری ڈومین
 gov.in/nic.in  
 ہی استعمال کیا جائے گا۔ اس کے علاوہ کسی اور ویب سائٹ یا سرور پر ای میل آئی ڈی نہیں بنایا جائے گا۔ وزارت داخلہ نے حکم دیا ہے کہ اس ہدایت کو سختی سے اپنے اپنےدفتروں میں نافذ کیا جائے۔  تاکہ متذکرہ واقعے کی طرح کوئی اور واقعہ پیش نہ آئے۔ مذکورہ واقعے سے معلوم ہوتا ہے کہ  ریاست میں جعلساز اور مجرمانہ ذہنیت کے لوگ کس قدر سرگرم ہیں ۔