نائب وزیر اعلیٰ دیویندر فرنویس نے کہا کہ دھاراوی پروجیکٹ کیلئے ضروری ‘ لیٹر آف اِنٹینٹ ‘ ابھی جاری نہیں کیا گیا ہے

کیا ایشیاء کی سب سے بڑی جھوپڑ پٹی  دھاراوی کی تعمیر نو کے لئے اڈانی گروپ کو دیا گیا ٹھیکہ کھٹائی میں پڑ گیا ہے؟ کیا ہنڈن برگ ریسرچ کی رپورٹ کے بعد گروپ کی مالی حالت کو لے کر مہاراشٹر حکومت اندیشہ کا شکار ہے؟  یہ ایسے سوال ہیں جو دھاراوی کی تعمیر کو لے کر موضوعِ بحث بنے ہوئے ہیں۔ ان سوالوں میں سے ایک کا جواب نائب وزیر اعلیٰ دیویندر فرنویس نے یوں دیا کہ فی الحال کمپنی کو ضروری ’لیٹر آف انٹینٹ ‘ جاری نہیں کیا گیا ہے لیکن یہ پروجیکٹ اپنے وقت پر مکمل کروایا جائے گا۔مگر ذرائع کے حوالے سے یہ خبریں آرہی ہیں کہ کمپنی کو لیٹر آف انٹینٹ (کام کرنے کی حمایت والا خط) تبھی جاری کیا جائے گا جب حکومت کو بھروسہ ہوگا کہ کمپنی کے پاس موافق مالی وسائل ہیں اور بینک کمپنی کو قرض دے سکتے ہیں۔ 
 اس بارے میں سبھی سرکاری محکموں کی تصدیق اور اتفاق کے بعد ہی کمپنی کو کام کرنے کی ہری جھنڈی دی جائے گی۔توجہ طلب ہے کہ دھاراوی کی تعمیر کا ٹھیکہ مہاراشٹر حکومت نے گوتم اڈانی کی کنسٹرکشن کمپنی اڈانی انفراسٹرکچر کو دیا تھا۔لیکن ہنڈن برگ ریسرچ کی  رپورٹ سامنے آئی جس میں کہا گیا کہ اڈانی گروپ کی کمپنیوں پر بے شمار قرض ہے اور کمپنی کی مالی حالت اچھی نہیں ہے۔ اس رپورٹ کے بعد حالات تبدیل ہو گئے ہیں۔ اس تعلق سے کانگریس رکن اسمبلی ورشا گائیکواڈ  حکومت سے سوال پوچھا تھا جس کے جواب میں فرنویس نے مذکورہ بالا باتیں کہی ہیں۔انہوں نے یہ بھی یقین دلایا کہ حکومت یقینی بنائے گی کہ یہ پروجیکٹ  اپنے وقت پر مکمل ہو۔