فرانسیسی وزارت داخلہ نے بتایا کہ ملک بھر میں جمعرات کو۱۰؍ لاکھ۸۹؍ ہزار افراد نے سڑکوں پر مظاہرہ کیا جو کہ۱۵؍ مارچ کوہونے والے احتجاج سے دوگنا ہے۔ تاہم یہ۱۹،۳۱؍ جنوری اور۷؍مارچ کو ہونے والے مظاہروں سے کم تھا

 فرانس میں پنشن اصلاحات کے خلاف مظاہروں میں۱۰؍ لاکھ سے زیادہ لوگ شامل ہوئے ہیں۔ فرانسیسی میڈیا نے جمعرات کو یہ رپورٹ دی ہے۔ فرانس کی وزارت داخلہ کے مطابق ملک بھر میں پنشن اصلاحات کے خلاف مظاہروں میں ۱۰؍ لاکھ سے زائد افراد نے حصہ لیا جبکہ یونینوں کا کہنا ہے کہ ان مظاہروں میں ۳۰؍ لاکھ سے زائد افرادشامل ہوئے۔
 وزارت داخلہ نے بتایا کہ فرانس میں جمعرات کو۱۰؍ لاکھ۸۹؍ ہزار مظاہرین نے سڑکوں پر مظاہرہ کیا۔ جو کہ۱۵؍ مارچ کوہونے والے احتجاج سے دوگنا ہے۔ تاہم یہ۱۹،۳۱؍ جنوری اور۷؍مارچ کو ہونے والے مظاہروں سے کم تھا۔ مونڈے اخبار کی رپورٹ کے مطابق مظاہرین کی تعداد تقریباً۱۲؍ لاکھ تھی۔ میڈیا رپورٹس کے مطابق فرانس کی سب سے بڑی یونین نے کہا کہ ملک بھر میں ہونے والے مظاہروں میں ریکارڈ۳۵؍ لاکھ افراد نے حصہ لیا۔ پولیس کے مطابق پیرس میں تقریباً ایک لاکھ۲۰؍ ہزار اور یونینز کے مطابق ۸؍ لاکھ لوگ جمع ہوئے۔
 اطلاعات کے مطابق، مظاہروں کے دوران فرانس کے دارالحکومت میں سیاہ فام گروپ کے بنیاد پرستوں اور پولیس افسران کے درمیان جھڑپیں ہوئیں۔ پولیس نے مظاہرین کو منتشر کرنے کے لئے آنسو گیس کا استعمال کیا، جائے وقوعہ پر واٹر کینن بھی دیکھی گئی۔ وزارت داخلہ نے کہا کہ جمعرات کی شام تک ملک بھر میں۸۰؍ افراد کو حراست میں لیا گیا اور اس دوران تقریباً ۱۲۰؍ پولیس اہلکار زخمی ہوئے۔ بی ایف ایم ٹی وی براڈکاسٹر کے مطابق، فرانس کی بڑی یونینوں نے۲۸؍ مارچ کو پنشن اصلاحات کے خلاف ۱۰؍ ویں ملک گیر احتجاج کا اعلان کیا ہے۔ مظاہرہ کے بعد فرانسیسی وزیر اعظم ایلزبتھ بورن نے ٹویٹ کیا کہ جو تشدد اور نقصان ہم نے دیکھا وہ ناقابل قبول ہے، میں پولیس اور ایمرجنسی سروسیز کی شکر گزار ہوں جنہوں نے صورتحال کو قابو میں رکھا۔