ایئر لائن کو ریگولیٹر ڈی جی سی اے نے نوٹس جاری کیا اور کمپنی کو ۱۵؍دن میں جواب دینے کیلئے کہا ہے۔ اسپائس جیٹ کو بھی نوٹس جاری کیا گیا

گو فرسٹ  ایئر لائن کی طرف سے اچانک تمام پروازیں منسوخ کرنے اور دیوالیہ کی کارروائی کیلئے  اپیل دائر کرنے کے بعد ایئر لائن کو ریگولیٹرڈی جی سی اے  کی طرف سے وجہ بتاؤ نوٹس جاری کیا گیا ہے۔ یہ نوٹس ایئر کرافٹ رولز ۱۹۳۷ء کے تحت محفوظ، موثر اور قابل بھروسہ طریقے سے فضائی خدمات کو جاری رکھنے میں کمپنی کی ناکامی پر جاری کیا گیا ہے۔
 نوٹس میں ایئرلائن کو ۱۵؍ دن میں جواب دینےکیلئےکہا گیا ہے۔ ایئر لائن کے جواب کی بنیاد پرڈی جی سی اے کی طرف سے کمپنی کو دیئے گئے ایئر آپریٹنگ سرٹیفکیٹ(اے او سی ) پر فیصلہ کیا جائے گا۔ ڈی جی سی اے نے ایک بیان میں کہا کہ گوفرسٹ کو ہدایت دی گئی ہے کہ وہ ٹکٹوں کی بکنگ اور ٹکٹوں کی فروخت براہ راست اور بالواسطہ  ذرائع  سے فوری طور پر اگلے احکامات تک بند کردے۔ آپ کو بتاتے چلیں کہ ۲؍مئی کو ایئر لائن نے اچانک اپنی تمام پروازیں یہ کہتے ہوئے منسوخ کر دی تھیں کہ وہ فنڈس کی کمی کی وجہ سے ایئر لائن کو چلانے سے قاصر ہے۔
اسپائس جیٹ کو بھی نوٹس جاری
 نیشنل کمپنی لا ٹریبونل (این سی ایل ٹی) نے ہوائی جہاز لیز پر دینے والی کمپنی کی درخواست پر اسپائس جیٹ ایئر لائن کو نوٹس جاری کیا ہے۔ یہ عرضی آئر لینڈ ایئر کیسل لمیٹڈ کی جانب سے دائر کی گئی تھی۔ اسپائس جیٹ کے ترجمان نے کہا کہ کمپنی کو موصول ہونے والا نوٹس ایک عام عمل کا حصہ ہے۔ یہ عرضی کمپنی کی  جانب سے۲۸؍ اپریل کو دائر کی گئی تھی۔ پچھلے ہفتے کمپنی نے کہا تھا کہ ایئر کیسل کا کوئی بھی طیارہ اسپائس جیٹ   کے بیڑے کا حصہ نہیں ہے۔
جلد معاملے طے کرنے کیلئے اپیل 
  پریشانی کا شکار ایئر لائن گو فرسٹ نے پیر کو این سی ایل ٹی  سے اپنی رضاکارانہ دیوالیہ  کے حل کی درخواست پر جلد فیصلہ کرنے کی درخواست کی ہے۔ دریں اثنا،  قرض فراہم کرنے والوں نے ایئر لائن کے طیاروں کی رجسٹریشن ختم کرنا شروع کر دیا ہے۔ قبل ازیں ٹربیونل نے گو فرسٹ کی عرضی سننے کے بعد۴؍ مئی کو اپنا فیصلہ محفوظ کر لیا تھا۔ سینئر وکیل پی ناگیش نے پرنجل کشور کے ساتھ  پیر کی صبح کے وقت راملنگم سدھاکر کی سربراہی والی پرنسپل بنچ کے سامنے اس معاملے کا ذکر کیا۔ انہوں نے ٹربیونل پر زور دیا کہ وہ ان کی درخواست پر جلد فیصلہ کرے کیونکہ قرض دینے والوں نے ایئر لائن کے طیاروں کی ڈی رجسٹریشن شروع کر دی ہے۔دوسری طرف  بنچ نے کہا کہ گو فرسٹ کی درخواست پر غور کریں گے اور اس معاملے کو جلد سے جلد نمٹانے کی کوشش کریں گے۔